ខេត្តស្វាយរៀង៖ បុរសម្នាក់បាន បាត់មួយយប់មិនឃើញត្រលប់មកផ្ទះវិញ ទើបព្រឹកឡើងនាំគ្នាដើរ ស្វែងរក ស្រាប់តែប្រទះឃើញស្លាប់ក្នុងរណ្ដៅទឹកអាអ៊ិចជីកជ្រៅ បង្កការភ្ញាក់ផ្អើល កើតឡើងកាលពីម៉ោង៦និង១៥នាទីព្រឹកថ្ងៃទី២០ ខែមេសា ឆ្នំា២០២១នៅចំណុចវាលស្រែ ក្នុងភូមិស្វាយអង្គ ឃុំស្វាយអង្គ ស្រុកស្វាយជ្រំ។
សមត្ថកិច្ចនគរបាលស្រុកបានឱ្យដឹងថា បុរសខាងលើមានឈ្មោះ ពៅ យ៉ង់ អាយុ២៤ឆ្នាំ មុខរបរកសិករ រស់នៅភូមិភូមិស្វាយអង្គ ឃុំស្វាយអង្គ ស្រុកស្វាយជ្រំ ។
ក្រោយពីមានសេចក្ដីរាយការណ៍ពីលោកមេភូមិភ្លាម សមត្ថកិច្ចស្រុកសហការជាមួយកម្លាំងប៉ុស្តិ៍រដ្ឋបាលនិងគ្រូពេទ្យបានចុះមកដល់កន្លែងកើតហេតុពិនិត្យសពភ្លាមៗ ហើយសន្និដ្ឋានថា ជនរងគ្រោះពិតជាស្លាប់ដោយលង់ទឹកប្រាកដមែនដោយមិនមានអ្វីដែលសម្គាល់ថាជារឿងឃាតកម្មនោះឡើយ។
បើតាមអ្នកភូមិបានប្រាប់ថា មុនកើតហេតុនៅពេលយប់ថ្ងៃទី១៩ខែមេសាឆ្នាំ២០២១គេឃើញបុរសខាងលើនេះបានចេញពីផ្ទះដើម្បីដើរឆ្លុះកង្កែប ព្រោះមេឃភ្លៀងរលឹមស្រិចៗងាយស្រួលរកឆ្លុះ។ ស្រាប់តែ ព្រឹកឡើងប្រទះឃើញស្លាប់ក្នុងរណ្ដៅទឹកអាអ៊ិចជីកជ្រៅ ទៅវិញ៕
