ភ្នំពេញ ៖ ក្រសួងពាណិជ្ជកម្ម ស្នើដល់ផលិតករ ឬ អ្នកនាំចេញទាំងអស់ បន្តដាក់ពាក្យស្នើសុំវិញ្ញាបនបត្របញ្ជាក់ដើមកំណើតទំនិញតាមប្រព័ន្ធស្វ័យប្រវត្តកម្ម ដើម្បីនាំចេញទំនិញទៅបរទេសជាប្រក្រតី។
បើយោងតាមសេចក្តីជូនដំណឹងរបស់ក្រសួងពាណិជ្ជកម្ម នៅព្រឹកថ្ងៃទី ២០ មេសានេះ បានអំពាវនាវដល់អ្នកឧកញ៉ា លោកឧកញ៉ា លោក លោកស្រី អ្នកនាង កញ្ញា ដែលជាផលិតករ ឬអ្នកនាំចេញ បន្តដាក់ពាក្យស្នើសុំវិញ្ញាបនបត្របញ្ជាក់ដើមកំណើតទំនិញតាមប្រព័ន្ធស្វ័យប្រវត្តកម្ម co.moc.gov.kh ។
ទន្ទឹមនិងនេះ ក្រសួងពាណិជ្ជកម្ម ក៏បានបញ្ជាក់ជូន ទៅ ផលិតករ ឬអ្នកនាំចេញទាំងអស់ថា ដើម្បីធានានិរន្តរភាពនៃការផ្តល់សេវាសាធារណៈរបស់ក្រសួងពាណិជ្ជកម្ម ក្រសួងបានចាត់តាំងមន្ត្រីតាមគោលការណ៍ណែនាំរបស់រាជរដ្ឋាភិបាលឱ្យប្រចាំការក្នុងការផ្តល់វិញ្ញាបនបត្របញ្ជាក់ដើមកំណើតទំនិញសម្រាប់ការនាំចេញទំនិញទៅបរទេសជាប្រក្រតី៕
