ខេត្តស្វាយរៀង ៖ ជម្លោះក្នុងគ្រួសារ បង្កជាហិង្សា បណ្តាលអោយស្រ្តីជាប្រពន្ធ ទ្រាំមិនបាន យកទួណឺវីស មកចាក់ចំដើមទ្រូងប្តី បណ្ដាលឱ្យ ប្រកាច់ ស្លាប់ ភ្លាមៗ នៅកន្លែងកើតហេតុ កាលពីយប់ ថ្ងៃទី១២ ខែមេសា ឆ្នាំ២០២១ នៅចំណុចភូមិឫស្សីជួរខាងជើង ឃុំក្រោលគោ ស្រុកស្វាយជ្រំ ខេត្តស្វាយរៀង។
សមត្ថកិច្ចនគរបាលបានឱ្យដឹងថា ស្ត្រីសង្ស័យជាប្រពន្ធមានឈ្មោះ សុខ សារ៉ាត់ អាយុ៤៨ឆ្នាំ មុខរបរកសិករ រស់នៅភូមិឫស្សីជួរខាងជើង ឃុំក្រោលគោ ស្រុកស្វាយជ្រំ ខេត្តស្វាយរៀង។
ចំណែកជនរងគ្រោះជាប្ដីមានឈ្មោះ ធឹម សំណាង ហៅធុង អាយុ៤៨ឆ្នាំ មុខរបរកសិករ រស់នៅភូមិឫស្សីជួរខាងជើង ឃុំក្រោលគោ ស្រុកស្វាយជ្រំខេត្តស្វាយរៀង។
អ្នកភូមិបានឱ្យដឹងថា មុនកើតហេតុជនរងគ្រោះជាប្ដីបានផឹកស្រាស្រវឹងហើយក៏បានមានជម្លោះ ឈ្លោះប្រកែកគ្នា ជាមួយប្រពន្ធ នៅផ្ទះរបស់ខ្លួនយ៉ាងខ្លាំង រហូតដល់ផ្អើលអ្នកភូមិ។
ប្រភពបន្តថា ក្រោយមកបុរសជាប្ដីក៏បានដើរមកលេងផ្ទះអ្នកភូមិឈ្មោះញឹម ធាង ភេទប្រុស អាយុ៥៣ឆ្នាំ មុខរបរកសិករ ដែលរស់នៅភូមិឃំុជាមួយគ្នា ប៉ុន្តែស្ត្រីជាប្រពន្ធក៏បានដើរមករករឿងឈ្លោះប្រកែកគ្នាម្ដងទៀត ហើយខណៈនោះស្រាប់តែយកទួណឺវីស មកចាក់ចំទ្រូងប្ដី បណ្ដាលឱ្យប្រកាច់ស្លាប់ នៅនឹងកន្លែងកើតហេតុតែម្ដង។
សពក្រោយពីសមត្ថកិច្ចពិនិត្យនិងធ្វើកំណត់ហេតុរួចបានប្រគល់ឱ្យបងប្អូនក្រុមគ្រួសារយកទៅធ្វើបុណ្យតាមប្រពៃណីចំណែកស្ត្រីដៃដល់ត្រូវបានសមត្ថកិច្ចកសាងសំណុំរឿងចាត់ការបន្តតាមច្បាប់៕
