បរទេស៖ រហូតមកដល់ពេលនេះ របបយោធាភូមាបានចាប់ខ្លួនលោក Paing Takhon តារាបង្ហាញម៉ូត និងសម្ដែងល្បីល្បាញរបស់ប្រទេសនេះ ហើយនឹងបន្ដតាមចាប់ខ្លួនតារាល្បីៗជាង១០០នាក់ផ្សេងទៀត ។
ក្រោយពេលក្រុមតារាល្បីៗ រួមមាន តារាចម្រៀង បង្ហាញម៉ូត និងតារាភាពយន្ដ នាំគ្នាចូលរួមធ្វើបាតុកម្មជាមួយនឹងប្រជាពលរដ្ឋភូមានោះមក ធ្វើឲ្យមេដឹកនាំរដ្ឋប្រហារយោធា នៃប្រទេសនេះ កាន់តែខឹងសម្បាយ៉ាងខ្លាំង។ ដោយសារតែបញ្ហានេះ ទើបរបបយោធាភូមាចេញដីការតាមចាប់ខ្លួនតារាល្បីៗជាង១០០នាក់ ហើយក្នុងនោះមាន បវរកញ្ញា Miss Grand Myanmar នាង Han Lay អាយុ២២ឆ្នាំផងដែរ ។
ដោយឡែកគណនី Facebook បងស្រីបង្កើតតារាប្រុ Paing Takhon បានបង្ហោះរៀបរាប់ទាំងទឹកភ្នែក ដើម្បីសុំជំនួយពីពិភពលោកឲ្យជួយអន្តរាគមន៍ជួយប្អូនប្រុសរបស់នាង ក្រោយពេលត្រូវពួកយោធាមីយ៉ាន់ម៉ាចាប់ខ្លួន ។
បងស្រីរបស់ Paing Takhon បានសរសេរបញ្ជាក់ថា «នៅម៉ោងប្រមាណ៥ព្រឹកនេះ (ថ្ងៃទី៨ ខែមេសា ) ប្អូនប្រុសរបស់នាងត្រូវក្រុមទាហាន និងប៉ូលិសមីយ៉ាន់ម៉ា សម្រុកចូលចាប់ខ្លួន នៅក្នុងផ្ទះ បន្ទាប់ពីមានដីកាចាប់ខ្លួន ពីថ្ងៃទី៧ ខែមេសា ឆ្នាំ២០២១។ ក្រុមប៉ូលិសមីយ៉ាន់ម៉ាអមជាមួយរថយន្ត៨គ្រឿង បានសម្រុកចូលចាប់ខ្លួន Paing Takhon នៅក្នុងផ្ទះទាំងព្រឹកព្រលឹម ដែលមានទីតាំងនៅ យ៉ាំងហ្គូន ។
ទោះជាយ៉ាងណា រហូតមកដល់ពេលនេះ នាងមិនទាន់អាចទាក់ទងទៅប្អូនប្រុសបាននៅឡើយ ទើបធ្វើឲ្យក្រុមគ្រួសារព្រួយបារម្ភ អំពីសុវត្ថិភាពរបស់ Paing Takhon យ៉ាងខ្លំាង ដោយមិនដឹងសុខទុក្ខយ៉ាងណា»។ រីឯក្រុមគ្រួសាររបស់តារាប្រុសល្បីលំដាប់អាស៊ី Paing Takhon និងអ្នកគាំទ្រ បានត្រឹមបន់ស្រន់សូមកុំឲ្យមានរឿងអ្វីកើតឡើងលើ Paing Takhon និងរង់ចាំតាមដានជាបន្តទៀត ។
សារព័ត៌មាន Global Nes Light គ្រប់គ្រង ដោយរបបយោធា កាលពីថ្ងៃទី៥ ខែមេសា ឆ្នាំ២០២១ បានផ្សព្វផ្សាយថា បុគ្គលមានឥទ្ធិពលជាច្រើនរូប នៅក្នុងប្រទេស រួមមាន ទាំងតារាចម្រៀង តារាភាពយន្ត តារាបង្ហាញម៉ូដ និងបវរកញ្ញា សុទ្ធតែស្ថិតក្នុងបញ្ជីឈ្មោះខ្មៅរបស់យោធាភូមា ហើយពួកគេត្រូវប្រឈមនឹងការចាប់ខ្លួន ក្រោមការចោទប្រកាន់ពីបទ «ញុះញង់ប្រឆាំងនឹងយោធា និងបង្កហិង្សា» ។
ពួកយោធាភូមា បានចោទប្រកាន់មនុស្សល្បីល្បាញទាំងនោះ ពីការបំពានច្បាប់ តាមមាត្រា ៥០៥ (A) នៃក្រមព្រហ្មទណ្ឌ ដោយបានផ្សព្វផ្សាយព័ត៌មាន បង្កឲ្យប៉ះពាល់ដល់ស្ថិរភាព និងសន្តិសុខជាតិ។ បើតាមក្រមព្រហ្មទណ្ឌនេះ អ្នកដែលត្រូវរបបយោធាចាប់ខ្លួនបាន អាចប្រឈមនឹងការជាប់ពន្ធនាគារ រយៈពេល៣ឆ្នាំ។
ប្រទេសភូមា ធ្លាក់ចូលទៅក្នុងវិបត្ដិនយោបាយយ៉ាងធ្ងន់ធ្ងរ ក្រោយពេលពួកយោធាធ្វើរដ្ឋប្រហារ រឹបអូសអំណាចពីរដ្ឋាភិបាលស៊ីវិល ហើយចាប់ឃុំខ្លួនលោកស្រី អ៊ុង សានស៊ូជី ក្រុមប្រឹក្សារដ្ឋ និងមន្រ្ដីជាន់ខ្ពស់រដ្ឋាភិបាលស៊ីវិលជាច្រើនរូបទៀត កាលពីថ្ងៃទី១ ខែកុម្ភៈ ឆ្នាំ២០២១។
រដ្ឋប្រហារយោធានេះ បានបណ្ដាលឲ្យមានការតវ៉ា ប្រឆាំងពីសំណាក់ប្រជាពលរដ្ឋគ្រប់ស្រទាប់វណ្ណៈ រួមមា ក្រុមគ្រូពេទ្យ សាស្រ្ដាចារ្យ តារាល្បីៗ សិស្ស និស្សិត មន្រ្ដីរដ្ឋការ និងប្រជាពលរដ្ឋស៊ីវិល។ រីឯពួកយោធាវិញ ក៏បានបង្រ្កាបយ៉ាងឃោរឃៅទៅលើប្រជាពលរដ្ឋ ដែលគ្មានអាវុធ នៅក្នុងដៃ បណ្ដាលឲ្យមនុស្សជា៥០០នាក់បាត់បង់ជីវិត ហើយពលរដ្ឋភូមានៅតែបន្ដបាត់បង់ជីវិតជារៀងរាល់ថ្ងៃ។
រហូតមកដល់ពេលនេះ ពួកយោធា បានចេញដីការតាមចាប់ខ្លួនបុគ្គលល្បី ចំនួន៦០នាក់ ដោយចោទប្រកាន់ទៅលើក្រុមតារាទាំងនោះ ពីការបង្កើនសកម្មភាពឃោសនា ញុះញង់ពលរដ្ឋឱ្យធ្វើបាតុកម្មប្រឆាំងយោធា។
តារាសម្តែងដ៏ល្បីល្បាញមួយរូបរបស់ភូមា នាង May Toe Khine បានសរសេរថា ឈ្មោះនាងស្ថិតក្នុងបញ្ជីខ្មៅរបស់យោធា ត្រូវតាមចាប់ខ្លួន ក្រោមការចោទថា នាងបានប្រើប្រាស់បណ្តាញសង្គម ញុះញង់ឱ្យពលរដ្ឋ ធ្វើបាតុកម្មប្រឆាំងនឹងយោធា។ ប៉ុន្តែធាតុពិត នាងបាននិយាយតាមអ្វីដែលបានកើតឡើងតែប៉ុណ្ណោះ។
គិតចាប់តាំងពីការធ្វើរដ្ឋប្រហារ នៅថ្ងៃទី១ ខែកុម្ភៈ ឆ្នាំ២០២១ រហូតមកដល់ថ្ងៃទី៧ ខែមេសា ឆ្នាំ២០២១ ក្រុមបាតុករអហិង្សា ចំនួន៥៧០នាក់ ត្រូវបានពួកយោធាបាញ់សម្លាប់ ហើយក្នុងនោះមានកុមារ៤៧នាក់។ ដោយឡែកមនុស្សរាប់ពាន់នាក់ផ្សេងទៀត ត្រូវបានចាប់ខ្លួន៕
