ខេត្តមណ្ឌលគិរី៖ នាព្រឹកថ្ងៃទី០៨ ខែមេសា ឆ្នាំ២០២១ លោកស្វាយ សំអ៊ាង អភិបាលខេត្ត និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត បានអញ្ជើញជាអធិបតី ក្នុងពិធីដុតបំផ្លាញដើមកញ្ឆាស្រស់ ដែលសមត្ថកិច្ចនៃស្នងការដ្ឋាននគរបាលខេត្តមណ្ឌលគិរី បានបង្ក្រាបនាពេលកន្លងមក។
ឱកាសនោះលោកអភិបាលខេត្ត បានឧបត្ថម្ភថវិកាចំនួន ១.០០០ដុល្លារដល់កម្លាំងនគរបាលគ្រឿងញៀន ដើម្បីជាការលើកទឹកចិត្ត និងប្រជាពលរដ្ឋដែលចូលរួមក្នុងម្នាក់ ២ម៉ឺនរៀលផងដែរ។
ក្នុងពិធីនោះដែរ ដោយមានការអញ្ជើញចូលរួមពីសំណាក់លោកឧត្តមសេនីយ៍ទោ ឡោ សុខា ស្នងការនគរបាលខេត្ត លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្ត លោកឧត្តមសេនីយ៍ទោ សាន គឹមអឿន មេបញ្ជាការតំបន់ប្រតិបត្តិការសឹករងខេត្ត រួមទាំងថ្នាក់ដឹកនាំមន្ទីរអង្គភាពពាក់ព័ន្ធ និងអាជ្ញាធរស្រុក ដែលប្រព្រឹត្តទៅនៅទីតាំងព្រលានយន្តហោះ ក្នុងភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី៕
