ខេត្ដបន្ទាយមានជ័យ ៖ យោងតាមប្រភព ព័ត៌មាន ពី សមត្ថកិច្ចជំនាញ ពាក់ព័ន្ធ នៅថ្ងៃទី២៩ ខែមីនា ឆ្នាំ២០២១ នេះកងកម្លាំងសមត្ថកិច្ចចម្រុះ ដែលមាន លោកវរសេនីយ៍ត្រី រស់ ពិសិដ្ឋ នាយប៉ុស្តិ៍បឹសាគូ ដឹកនាំកម្លាំង សហការជាមួយ កម្លាំងមូលដ្ឋាន កងរាជអាវុធហត្ថក្រុងប៉ោយប៉ែត និង កម្លាំងយោធាកងពលតូចលេខ៥១ បានតាមដានមុខសញ្ញារថយន្ត ដឹកមនុស្សលួចឆ្លងដែនខុសច្បាប់ សង្ស័យជា ( ជនជាតិថៃ ) នៅចំណុចស្តារហ្គោល ភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
ម្ចាស់រថយន្ត និងបក្សពួក ដែលកម្លាំងសមត្ថកិច្ចឃាត់ខួន រួមមាន ៖
១ .ឈ្មោះ យឹម នៅ ភេទប្រុស អាយុប្រហែល៤៧ឆ្នាំ មានតួនាទីជា(សមាជិកក្រុមប្រឹក្សាសង្កាត់ប៉ោយប៉ែត)
រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ (ម្ចាស់រថយន្តកដឹកមនុស្ស)។
២. ឈ្មោះ ចាន់ ណារ៉ុង ភេទប្រុស អាយុ៤០ឆ្នាំ បុគ្គលិកកាស៊ីណូ (ម្ចាស់ផ្ទះ) រស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
៣.ឈ្មោះ ដែង ជុំ ភេទប្រុស អាយុ៤៦ឆ្នាំ បុគ្គលិកកាស៊ីណូស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
៤. សម្រាប់ មនុស្សដែលឆ្លងដែន (សង្ស័យជាជនជាតិថៃ) នោះ សមត្ថកិច្ច ឃាត់ខ្លួនមិនទាន់ទេ ដោយ ភូមិសាស្ត្រតំបន់នោះនៅក្បែព្រំដែនថៃពេក ទើបពួកគាត់ រត់រួច ។
ប្រភពពី សមត្ថកិច្ច បានឱ្យដឹងថា ក្រុមសមត្ថកិច្ចចម្រុះ បានតាមដាន តាំងពីគោលដៅ ឡើងរថយន្ត ដោយ ឈ្មោះ យឹម នៅ បានធ្វើសកម្មភាពបើកបររថយន្តម៉ាកCamry ពណ៌ស ស្លាកលេខ ព្រះសីហនុ2A-1354 ដឹកមនុស្សចំនួន០៥នាក់ ស្រី០១នាក់ សង្ស័យជនជាតិថៃ លួចឆ្លងដែន ទៅប្រទេសថៃ ហើយអ្នកទាំង០៥នាក់ បានរត់ចូលទឹកដីថៃបាត់ បន្សល់ទុកនៅ វាលីដាក់ខោអាវ ចំនួន០២ និង ឆ្នាំងអ៊ុត ខោអាវ ចំនួន០១៕
