ភ្នំពេញ ៖ អគារថ្មីនៃអគ្គនាយកដ្ឋានព័ត៌មាននិងសោតទស្សន៍ និង អគារអគ្គនាយកដ្ឋានទីភ្នាក់ងារសារព័ត៌មានកម្ពុជាAKP នៃក្រសួងព័ត៌មាន សម្រេចសាងសង់បាន ៦៥ ភាគរយហើយៗគ្រោងនឹងបញ្ចប់នៅដើមឆ្នាំ ២០២២ ខាងមុខនេះ ។
ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានជំរុញលើកទឹកចិត្ត ដល់ក្រុមការងារសាងសង់ទាំងអស់ ធ្វើយ៉ាងណា ប្រឹងប្រែងកសាងអគារថ្មីទាំង២នេះ ឱ្យស្រមតាមបទដ្ឋានស្តង់ដារបច្ចេកទេសនៃសំណង់អគារ ឱ្យបានត្រឹមត្រូវ រឹងមាំ ដើម្បីប្រើបាស់បានយូរអង្វែង ។ ឯកឧត្តម រំពឹងថាបន្ទាប់ពីអគារនេះសាងសង់ហើយរួចរាល់ នឹងធ្វើឱ្យថ្នាក់ដឹកនាំ និង មន្រ្តីរាជការនៃអគ្គនាយកដ្ឋានទាំងពីរ មានអគារថ្មីមួយទៀតសម្រាប់បំពេញកិច្ចការងារទៅតាមផ្នែក តាមជំនាញ នីមួយៗ កាន់តែល្អ ព្រោះថាពីមួយថ្ងៃទៅមួយថ្ងៃ សម្រាប់ក្រសួងព័ត៌មាន កាន់តែមានកិច្ចការងារជាច្រើន ដែលត្រូវបំពេញទាំងថ្នាក់ជាតិ និងអន្តរជាតិ ដើម្បីធ្វើយ៉ាងណាឱ្យវិស័យព័ត៌មាន និង សោតទស្សន៍កាន់តែរីកចម្រើន ស្របតាមការវិវត្តន៍នៃបច្ចេកវិទ្យាព័ត៌មាន វិទ្យា និងស្របតាមទិសស្លោក ប្លែក លឿន ទុកចិត្តបាន នៅទីណា ពេលណាក៏បាន។
បើតាមការបញ្ជាក់របស់គណៈកម្មការសាងសង់បានឱ្យដឹងថា អគារថ្មីនេះមានកំពស់ ១៤ ជាន់ បណ្តោយ ៦៥ ម៉ែត្រ ទទឹង ១៤ ម៉ែត្រ មានបន្ទប់បំពេញការងារជាង ៣០០ បន្ទប់ ។ អគារនេះសាងសង់ដោយក្រុមហ៊ុន ឃុន សៀ ឌីវីឡុបមីនគ្រុប សហការ ជាមួយក្រុមហ៊ុន BELLETONE ប្រទេសចិន ដោយគ្រោងហើយរួចរាល់ក្នុងរយពេល ២៤ ខែ ។ ដំណើរការសាង់សង់មកដល់ពេលនេះ សម្រេចបាន ៦៥ភាគរយហើយៗតាមគម្រោងគឺនឹងហើយជាស្ថាពរនៅដើមឆ្នាំ ២០២២ ខាងមុខនេះ។ អគារថ្មីនេះ បានចាប់ដំណើរការបើកការដ្ឋានសាងសង់ កាលថ្ងៃទី៤ ខែធ្នូ ឆ្នាំ ២០១៩ ៕
