ខេត្តព្រះវិហារ ៖ ឧត្តមសេនីយ៍ទោ ច័ន្ទ សុភ័ក្រ្តា ប្រធានសមាគមអតីតយុទ្ធជនកម្ពុជាខេត្តព្រះវិហារ កាលពីរសៀល ថ្ងៃទី១៧ ខែមីនា ឆ្នាំ២០២១ ដឹកនាំក្រុមការងារសមាគមខេត្ត សាលាក្រុងព្រះវិហារ, ប្រធាន/អនុប្រធាន សាខាក្រុង, ស.ស.យ.ក.ក្រុង រួមជាមួយ អាជ្ញាធរមូលដ្ឋាន ភូមិ ឃុំ សរុបចំនួនជិត១០០នាក់ ចុះជួយលើកផ្ទះ ២ខ្នង ក្នុងចំណោមផ្ទះចំនួន ១៥ខ្នង ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា ស្ថិតនៅភូមិអភិវឌ្ឍន៍ សង្កាត់ប៉ាលហាល ក្រុងព្រះវិហារ ខេត្ដព្រះវិហា។
សូមបញ្ជាក់ថា ផ្ទះដែលត្រូវសាងសង់ និងប្រគល់ជូនសមាជិកសមាគមអតីតយុទ្ធជន១ខ្នងមានទំហំ ៥ គុណ៧ម៉ែត្រធ្វើអំពីដែប្រក់ស័ង្កសី និងតយ៉ាកក្រោយ ២ម៉ែត្រក្នុងទំហំដី១៥ម៉ែត្រ គុណ៤០ម៉ែត្រ លើដីសម្បទានជប៉ុន YNS ដែលបានផ្តល់ជូនដល់សមាគមអតីតយុទ្ធជនកម្ពុជាខេត្តព្រះវិហារ សម្រាប់ចែកជូនគ្រួសារអតីតយុទ្ធជន ដែលគ្មានដី គ្មានផ្ទះ មានជីវភាពក្រីក្រលំបាក ។
ឧត្តមសេនីយ៍ទោ ច័ន្ទ សុភ័ក្រ្តា ប្រធានសមាគមអតីត យុទ្ធជនខេត្ត បានលើកឡើងថា នេះជាការយកចិត្តទុកដាក់របស់សម្ដេចប្រធាន ក៏ដូចជា អនុប្រធាន និងសមាសភាពថ្នាក់ដឹកនាំ កំពូលៗសមាគមអតីតយុទ្ធជនកម្ពុជា ធ្វើឲ្យសមាជិកអតីត យុទ្ធជនមានសង្ឃឹមក្នុងការរស់នៅបានល្អប្រសើរដូចប្រជាពលរដ្ឋដទៃ ក្រោយពីបញ្ចប់ការងារការពារជាតិមាតុភូមិឲ្យប្រទេសកម្ពុជារួចផុត ពីភ្លើង សង្រ្គាមដ៏រាំរ៉ៃកន្លងមក៕
