កីឡាបរទេស ៖ ក្តីស្រម៉ៃរបស់កីឡាករ Cristiano Ronaldo ចង់ឈ្នះពានរង្វាន់ UEFA Champions League ជាមួយក្លិប Juventus នោះគឺមិនអាចទេ ព្រោះបន្ទាប់ពីក្រុម Juventus ធ្លាក់ត្រឹមវគ្គ១៦ក្រុម ដោយសារថ្វីជើងរបស់ក្រុមPorto មកនោះក្រុម Juventus គ្រោងលក់ Cristiano Ronaldo ចេញហើយនៅរដូវក្ដៅខាងមុខនេះ តម្លៃខ្លួនរាប់ចាប់ពី២៥លានផោនឡើងទៅ។
សារព័ត៏មាននៅអ៊ីតាលីបានចុះផ្សាយព្រាតថាក្រុម Juventus គ្រោងលក់ Cristiano Ronaldo ចេញហើយនៅរដូវក្ដៅខាងមុខនេះ ត្រឹមតែ២៥លានផោនប៉ុណ្ណោះ។ ដោយRonaldo មិនអាចសម្រេចបំណងរបស់ក្រុម Juventus បានទេ បើទោះជាកន្លងមកនេះបានឈ្នះពានរង្វាន់លីគជាមួយក្រុមមួយនេះហើយក៏ដោយ។
ក្រុមសេះបង្កង់ Juventus បានទិញអតីតកីឡាករ Real Madrid នេះមក គឺក្នុងគោលបំណងចង់ឈ្នះពានរង្វាន់ UEFA Champions League ដែលពួកគេខកខានឈ្នះវាជាច្រើនឆ្នាំមកហើយ។ តែផ្ទុយទៅវិញកន្លងមកមិនអាចឈ្នះបានទេ ហើយចុងក្រោយនេះធ្លាក់ត្រឹមវគ្គ១៦ក្រុមចុងក្រោយទៀត។ គេមើលឃើញថា Ronaldo មិនអាចជួយក្រុមបានឡើយ ហើយណាមួយតម្លៃពលកម្មរបស់គេខ្ពស់ដល់ទៅ២៨លានផោនក្នុង១ឆ្នាំឯណោះ ទើបបានជាក្រុម Juventus មានបំណងលក់រូបគេចេញនៅរដូវក្ដៅតែម្ដង។
បន្ទាប់ពីលេចឮដំណឹងថាក្រុមសេះបង្កង់ Juventus គ្រោងលក់ចេញនារដូវកាលក្រោយនេះ ក៏នាំឲ្យមានការសង្ស័យថា Cristiano Ronaldo គឺអាចនឹងចាកចេញមែន ហើយមានភាគរយផ្ទេរទៅក្លឹប២ នៅបារាំងឬអង់គ្លេស ឬក៏ដូចជាការវិលត្រលប់ទៅ Real Madrid វិញក៍ថាបានដែរ។ យ៉ាងណាសម្រាប់អ្នកចាត់ការលោក Zinedine Zidane របស់ Real Madrid ក៏បានចេញមុខមកនិយាយរឿងហ្នឹងហើយ ដោយលោកថា លោកមិនអាចបង្ហាញការយល់ឃើញអ្វីទាំងអស់ ពោលគឺពេលនេះត្រូវគោរពដល់ក្លឹបអាណាព្យាបាល Juventus។
ប្រាប់មុនដល់ការប្រកួតទល់ Elche រាត្រីនេះ Zidane និយាយ៖ “ហ្នឹងហើយ អ្នកធ្លាប់ដឹងហើយថា Cristiano គេសំខាន់ប៉ុណ្ណាសម្រាប់ Madrid ចំពោះអ្វីដែលគេសម្រេចបាននៅទីនេះគឺពិតជាអស្ចារ្យ”។ លោកបន្ត “ប៉ុន្តែពេលនេះគឺជាកីឡាករ Juventus ហើយគេកំពុងធ្វើបានល្អនៅទីនោះ ដោយខ្ញុំមិនអាចនិយាយអ្វីទាំងអស់ បើទោះបីជាមានការលើកឡើងមួយចំនួន តែអ្នកត្រូវគោរពដល់រឿងហ្នឹងផង”៕
