ភ្នំពេញ ៖ កាលពីម៉ោង១១ព្រឹក ថ្ងៃទី១២ ខែមីនា ឆ្នាំ២០២១ កម្លាំងនគរបាលប៉ុស្តិ៍ច្បារអំពៅទី២ នៃអធិការដ្ឋាននគរបាលខណ្ឌច្បារអំពៅ ចុះឆ្មក់ចូលទៅចាប់វាយខ្នោះជនសង្ស័យម្នាក់ ខណៈពេលកំពុងតែអង្គុយលក់ថ្នាំញៀន ស្ថិតនៅបន្ទប់ជួលគ្មានលេខ ក្រុមទី២ ភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ។
លោកវរសេនីយ៍ត្រី អ៊ុ រតនា នាយប៉ុស្ដិ៍នគរបាលច្បារអំពៅទី២ បានឲ្យដឹងថា ជនសង្ស័យខាងលើនេះមានឈ្មោះ អ៊ឹម សុភ័ស ភេទប្រុស អាយុ៣៥ឆ្នាំ ស្នាក់នៅបន្ទប់ត្រង់ចំណុចឃាត់ខ្លួន មុខរបរមិនពិតប្រាកដ។
លោកនាយប៉ុស្តិ៍នគរបាលសង្កាត់ច្បារអំពៅទី២ បានប្រាប់ឲ្យដឹងទៀតថា ជនសង្ស័យដែលសមត្ថកិច្ចធ្វើការឃាត់ខ្លួនខាងលើនេះជាមុខសញ្ញាចែកចាយនិងប្រើប្រាស់គ្រឿងញៀនយ៉ាងសកម្មទើបកម្លាំងនគរបាលប៉ុស្តិ៍ច្បារអំពៅទី២សហការជាមួយកម្លាំងជំនាញប្រឆាំងគ្រឿងញៀននៃអធិការដ្ឋាននគរបាលខណ្ឌច្បារអំពៅបានបើកការស្រាវជ្រាវរហូតឈានដល់ការឃាត់ខ្លួននិងដកហូតគ្រឿងញៀនចំនួន៩កញ្ចប់ដែលជារបស់ជនសង្ស័យច្រកទុកសម្រាប់លក់ឲ្យម៉ូយបន្តនិងសម្រាប់ទុកជក់ខ្លួនឯងខ្លះ។
បច្ចុប្បន្ននេះ ជនសង្ស័យរួមនិងវត្ថុតាងត្រូវបានបញ្ជូនទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌច្បារអំពៅដើម្បីកសាងសំណុំរឿងបញ្ជូនទៅកាន់តុលាការចាត់ការតាមនីតិវិធី៕
