សិស្សសាលាប្រុសស្រី ២នាក់ ស្លាប់ភ្លាមៗ នៅកន្លែងកើតហេតុ ក្រោយជួបគ្រោះថ្នាក់ចរាចរណ៍រវាងម៉ូតូនឹងរថយន្តកុងន័រ

ខេត្តកណ្ដាល ៖ សិស្សសាលាប្រុសស្រី ២នាក់ បានស្លាប់ភ្លាមៗ នៅកន្លែងកើតហេតុ ក្នុងករណីគ្រោះថ្នាក់ចរាចរណ៍ រវាង រថយន្ត កុងតឺន័រ និងម៉ូតូ កាលពីថ្ងៃទី១០ ខែមិនា ឆ្នាំ២០២១ នៅចំនុចផ្លូវជាតិលេខ១ ចន្លោះគីឡូម៉ែត្រ ២២-២៣ ក្នុងភូមិ ស្លាបតាអោនឃុំគគីរ ស្រុកកៀនស្វាយខេត្តកណ្តាល។

ហេតុការគ្រោះថ្នាក់ចរាចរណ៍នេះកើតឡើង រវាងម៉ូតូមួយគ្រឿងម៉ាក់ហុងដា Zoomer X ពណ៌លឿងចាស់ ពាក់ផ្លាកលេខ ភ្នំពេញ 1GO.3516 បើកបរ ក្នុងទិសដៅពីរកើតមកលិច អ្នកបើកបរឈ្មោះ យ៉ាវ រដ្ឋា ភេទប្រុស អាយុ១៩ឆ្នាំ មានទីលំនៅភូមិដក់ពរ ឃុំស្វាយធំ ស្រុកស្វាយជ្រុំ ខេត្តស្វាយរៀង (ស្លាប់) អ្នករួមដំណើរ ឈ្មោះ ផាត ស្រីយ៉ា ភេទស្រី អាយុ១៧ឆ្នាំ មានទីលំនៅភូមិ អំពៅព្រៃ ឃុំចំបក់ ស្រុកស្វាយជ្រុំខេត្តស្វាយរៀង (ស្លាប់)។ អ្នកទាំង២នាក់ ជិះម៉ូតូឌុបគ្នា មកដល់ចំណុចកើតហេតុ បានបុកពីក្រោយ រថយន្តម៉ាក HINO សណ្តោងរ៉ឺម៉ក ពណ៌ខៀវ ក្បាលពាក់ផ្លាកលេខ ភ្នំពេញ 3C.8853 រ៉ឺម៉ក ផ្លាកលេខ ភ្នំពេញ 4A.1593 ទិសដៅបញ្ច្រះគ្នាដែលរថយន្តកំពង់បត់ឆ្លងផ្លូវ រីឯអ្នកបើកបររថយន្តកុងន័របានរត់គេចខ្លួនបាត់ស្រមោល។

ម៉ូតូនិងរថយន្ត ត្រូវបានកម្លាំងជំនាញយកទៅរក្សាទុកជាភស្តុតាងនៅអធិការដ្ឋាននគរបាលស្រុកកៀនស្វាយ ដើម្បីបន្តនីតិវិធីទៅតាមផ្លូវច្បាប់៕