ខេត្តកណ្ដាល ៖ បុរសម្នាក់ស្លាប់ភ្លាមៗ នៅកន្លែងកើតហេតុ ក្រោយជួបគ្រោះថ្នាក់ចរាចរណ៍ រវាងរថយន្តសាំងយ៉ុង មួយគ្រឿង បើកបរលឿនមិនប្រកាន់ស្ដាំ ជ្រុលទៅបុកម៉ូតូ P.C.X ពេញទំហឹង កាលពីរសៀល ថ្ងៃទី០៨ ខែមីនា ឆ្នាំ២០២១ ស្ថិតនៅភូមិ រកាកោង ឃុំរកាកោង១ ស្រុកមុខកំពូល ខេត្ដកណ្ដាល។
យោងតាមរបាយការណ៍ពីសមត្ថកិច្ច បានឱ្យដឹងថា មុនពេលកើតហេតុមានរថយន្ត១គ្រឿង ម៉ាកសាំងយ៉ុង ពណ៌ទឹកប្រាក់ ពាក់ស្លាកលេខ ភ្នំពេញ2BJ-4494 ដោយធ្វើដំណើរពីភ្នំពេញទៅកំពង់ចាម ហើយពេលមកដល់កន្លែងកើតហេតុ ក៏បានទៅបុកម៉ូតូ១គ្រឿងម៉ាក P.C.X ពណ៌ស ពាក់ស្លាកលេខភ្នំពេញ 1IG.6321 អ្នកបើកបរឈ្មោះ ផន វុទ្ធី ភេទប្រុស អាយុ ៣២ឆ្នាំ រស់នៅភូមិកងតាណឹងទី៨ ឃុំកងតាណឹង ស្រុកកងមាស ខេត្តកំពង់ចាម ដែលធ្វើដំណើរបញ្រ្ចាស់ទិសគ្នា បណ្ដាលឱ្យស្លាប់ភ្លាមៗនៅកន្លែងកើតហេតុតែម្ដង។ ចំណែកឯអ្នកបើករថយន្តបានរត់គេចខ្លួនបាត់ស្រមោល។
ក្រោយពេលកើតហេតុ កម្លាំងប៉ុស្តិ៍រកាកោង១ បានចុះទៅពិនិត្យកន្លែងកើតហេតុ និងវាស់វែង រួចបានយករថយន្ត និងម៉ូតូ ទៅរក្សាទុកនៅអធិការដ្ឋាននគរបាលស្រុកមុខកំពូល។
ចំណែកឯ សព បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
