ភ្នំពេញ៖ រយៈពេល២ខែ ដើមឆ្នាំ២០២១ កម្ពុជាបាននាំចេញស្រូវ ទៅវៀតណាម ចំនួន៧០៧ ៥៩៥ តោន ក្នុងនោះការនាំចេញផ្លូវការមានចំនួន៣៤៥ ៦០០តោន។ នេះបើតាមតួលេខដែលត្រូវបានផ្សព្វផ្សាយនៅលើហ្វេសប៊ុក លោក វេង សាខុន រដ្ឋមន្ត្រីក្រសួងកសិកម្ម នៅព្រឹកថ្ងៃទី៥ មីនា។
តាមលោក វេង សាខុន ទីផ្សារស្រូវឆ្នាំនេះ ល្អប្រសើរជាងឆ្នាំមុន ដោយកសិករអាចលក់ស្រូវតម្លៃ ៩៥០ ដល់ ១ ១៧០រៀល ក្នុងមួយគីឡូក្រាម។
ក្រៅពីតួលេខនាំចេញស្រូវ លោករដ្ឋមន្ត្រីកសិកម្ម ក៏បានបង្ហាញរបាយការណ៍របស់អគ្គនាយកដ្ឋានកសិកម្ម ជុំវិញការងារបង្កបង្កើនផលស្រូវប្រាំងផងដែរ។ គិតត្រឹមថ្ងៃទី៤ មីនា ឆ្នាំ២០២១ ការងារបង្កបង្កើនផលស្រូវរដូវប្រាំងរបស់ប្រជាកសិករ សម្រេចបាន ៦៤២ ៤៨៣ហិកតា កើនលើសផែនការជិត ៤០ភាគរយ។ ខេត្តដែលសម្រេចបានការដាំដុះស្រូវរដូវប្រាំងច្រើនជាងគេ មានខេត្តព្រៃវែង តាកែវ កំពង់ធំ កណ្តាល និងខេត្តបន្ទាយមានជ័យ។
បើតាម លោករដ្ឋមន្ត្រី ដ្បិតកសិករនៅតំបន់ខ្លះកំពុងមមាញឹកនឹងការងារសាបព្រោះមែន ប៉ុន្តែនៅតំបន់ខ្លះ ការប្រមូលផលស្រូវរដូវប្រាំងកំពុងដំណើរការបន្តបន្ទាប់ដែរ។ គិតមកត្រឹមថ្ងៃទី៤ មីនា ការប្រមូលផលស្រូវរដូវប្រាំងសម្រេចបានជាង ១,៤ លានតោន លើផ្ទៃដី ៣២៥ ៦១៣ ហិកតា។ យោងតាមការព្យាករ របស់អគ្គនាយកដ្ឋានកសិកម្ម ទិន្នផលស្រូវរដូវប្រាំងឆ្នាំនេះ អាចមានចំនួនជាង ២,៦ លានតោន៕
