ភ្នំពេញ ៖ យុវជនម្នាក់ ជាអ្នកលក់កាហ្វេ ត្រូវបានរថយន្តដឹកទំនិញ បើកយ៉ាងលឿនជ្រុលបុកពេញទំហឹងបណ្តាលអោយ ស្លាប់ភ្លាមៗ នៅកន្លែងកើតហេតុ កាលពីម៉ោងជាង២ រំលងអាធ្រាត្រឈានចូលថ្ងៃទី៥ ខែមីនា ឆ្នាំ២០២១ នៅចំណុចមុខច្រកចូលបុរីសង្ឃឹមថ្មី ក្នុងភូមិវាល សង្កាត់កន្ទោក ខណ្ឌកំបូល រាជធានីភ្នំពេញ។
ជនរងគ្រោះមានឈ្មោះ កាន សុខគង់ អាយុ២១ឆ្នាំ មុខរបរលក់កាហ្វេ រស់នៅក្នុងភូមិត្រពាំងសុព័រ ឃុំឆក់ឈើនាង ស្រុកអង្គស្នួល ខេត្តកណ្តាល ជិះម៉ូតូស្កុបពី ពណ៌ស ស៊េរីឆ្នាំ២០២១ ពាក់ផ្លាកលេខកណ្តាល 1AJ.0821 ជិះតែម្នាក់ឯង។ ចំណែករថយន្តបង្កម៉ាក NISSAN UD1400 ប្រភេទរថយន្តដឹកទំនិញធុនធំ ពណ៌សលាយបៃតង ពាក់ផ្លាកលេខភ្នំពេញ3C.0531 ។
ប្រជាពលរដ្ឋនៅកន្លែងកើតហេតុ បានអោយដឹងថា ម៉ូតូជនរងគ្រោះ បើកបរតាមបណ្ដោយផ្លូវជាតិលេខ៤ ទិសដៅពីកើតមកលិចក្នុងល្បឿនលឿន ខណៈមកដល់ចំណុចកើតហេតុ ស្រាប់តែមានរថយន្តធុនធំ បើកតាមបណ្ដោយផ្លូវជាតិលេខ៤ ទិសដៅពីលិចមកកើត យ៉ាងលឿនដូចគ្នា ហើយបានវ៉ាជែងរថយន្តមួយគ្រឿងទៀត ក៏ជ្រុលមកចំណីផ្លូវខាងស្ដាំម៉ូតូបណ្តាលឲ្យបុកចំពីមុខពេញទំហឹងអូសប្រហែល១០០ម៉ែត្រ ធ្វើឲ្យមនុស្សខ្ទាតចេញហើយកិនបែកក្បាលខ្ទេចស្លាប់ភ្លាមៗនៅនឹងកន្លែងកើតហេតុ។ ដោយឡែកអ្នកបើករថយន្តបង្កបានចុះរត់គេចខ្លួនបាត់ស្រមោល។
ក្រោយកើតហេតុ សមត្ថកិច្ចជំនាញ បានចុះមកវាស់វែងយកម៉ូតូនិងរថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមនីតិវិធី។ ចំណែកសពជនរងគ្រោះ ត្រូវបានសមត្ថកិច្ចធ្វើកំណត់ហេតុរួចប្រគល់ឲ្យសាច់ញាតិដឹកយកទៅស្រុកអង្គស្នួលធ្វើបុណ្យតាមប្រពៃណី៕
