បុរសម្នាក់ស្លាប់ភ្លាមៗនៅកន្លែងកើតហេតុ ក្រោយជួបគ្រោះថ្នាក់ រវាង រថយន្តដឹកដំឡូង បុកម៉ូតូ ខេត្តបន្ទាយមានជ័យ

ខេត្តបន្ទាយមានជ័យ ៖ បុរសម្នាក់បានស្លាប់ ភ្លាមៗនៅកន្លែងកើតហេតុ ក្រោយជួបគ្រោះចរាចរណ៍ រវាង រថយន្តធុនធំដឹកដំឡូងមី បានបើកបុកអ្នកជិះម៉ូតូ នៅលើកំណាត់ផ្លូវជាតិលេខ២៦៨A ក្នុងភូមិគោករំចេក ឃុំស្រះជីក ស្រុកភ្នំស្រុក ខេត្តបន្ទាយមានជ័យ កាលពីយប់ថ្ងៃទី០១ ខែមីនា ឆ្នាំ២០២១។

មន្ត្រីនគរបាលបានឱ្យដឹងថា ជនរងគ្រោះឈ្មោះ ឈឿន ប្រុស អាយុ៣១ឆ្នាំ នៅភូមិស្រះឈូកខាងកើត ឃុំស្រះជីក ស្រុកភ្នំស្រុក ខេត្តបន្ទាយមានជ័យ ជិះម៉ូតូ ម៉ាក ហុងដាឌ្រីម ពណ៌ខ្មៅ ស៊េរី២០១១ ពាក់ផ្លាកលេខ ប.មានជ័យ 1E-9205។

ចំណែករថយន្តបង្ក ជារថយន្ត ធុនធំ ម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ 3C-4649 ដឹកដំឡូងមី។ ក្រោយពីកើតហេតុអ្នកបើកបររថយន្ត បានរត់គេចខ្លួនបាត់៕