ខេត្តឧត្តរមានជ័យ ៖ ឯកឧត្តម ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ នាព្រឹកថ្ងៃអង្គារ ៤រោច ខែផល្គុន ឆ្នាំជូត ទោស័ក ព.ស. ២៥៦៤ ត្រូវនឹង ថ្ងៃទី២ ខែមីនា ឆ្នាំ២០២១ បន្តដឹកនាំក្រុមការងារចុះពិនិត្យ និងរៀបចំតង់នៅក្នុងបរិវេណពហុកីឡដ្ឋានខេត្តឧត្ដរមានជ័យ ដើម្បីទទួលពលករដែលធ្វើចំណាកស្រុកពីប្រទេសថៃ ចូលមកប្រទេសកម្ពុជា តាមរយៈច្រកទ្វារព្រំដែនអន្តរជាតិអូរស្មាច់នារសៀលនេះតែម្ដង។ ដោយសារតែស្ថានភាពបច្ចុប្បន្នបងប្អូនពលករដែលធ្វើចំណាកស្រុកពីប្រទេសថៃចូលមកប្រទេសកម្ពុជា តាមរយៈច្រកទ្វារព្រំដែនអន្តរជាតិអូរស្មាច់កាន់តែច្រើនឡើងៗ គិតមកដល់ពេលនេះមណ្ឌលចត្តាឡីស័កទាំង២១ នៅទូទាំងខេត្តឧត្តរមានជ័យត្រូវបានពេញ ដែលមានពលករកំពុងចត្តាឡីស័កមានចំនួន៣.៩៨៧នាក់។
ឯកឧត្តមអភិបាលខេត្ត បានឲ្យដឹងដែរថាសម្រាប់ទីតាំងពហុកីឡដ្ឋានខេត្តនេះ បច្ចុប្បន្នយើងបានរៀបចំតង់ចំនួន១០០ បង្គន់ និងបន្ទប់ទឹកសរុបចំនួន៤៤ និងបានរៀបចំប្រព័ន្ធទឹកភ្លើងរួចជាស្រេចផងដែរ ព្រមទាំងបានត្រៀមក្រុមគ្រូពេទ្យ ក៏ដូចជាកងកម្លាំងដាក់តាមគោលដៅរួចរាល់ផងដែរ៕
