ខេត្តកណ្ដាល៖ មន្ដ្រីពន្ធនាគារខេត្តកណ្ដាលម្នាក់ ត្រូវកម្លាំងនគរបាលចាប់ខ្លួន ក្រោមពាក្យបណ្ដឹងពីប្រជាពលរដ្ឋ អះអាងថា បុគ្គលរូបនេះបានបោកប្រាស់គេ ដើម្បីរត់ការដោះលែងមនុស្សចេញពីពន្ធនាគារ។
លោក តុង ដារ៉ា ជាមន្រ្ដីនគរបាលពន្ធនាគារ នៅក្នុងខេត្តកណ្ដាល ហើយមន្រ្ដីរូបនេះ ត្រូវបានការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្ដាល ឃាត់ខ្លួន។ បន្ទាប់ពីចាប់ខ្លួនរួចមក សមត្ថកិច្ចជំនាញបានបញ្ជូនជនសង័្សយទៅកាន់សាលាដំបូងខេត្តកណ្ដាល ដើម្បីផ្ដន្ទាទោសតាមផ្លូវច្បាប់ ហើយតំណាងអយ្យការអមសាលាដំបូង បានសម្រេចចោទប្រកាន់ និងបញ្ជូនទៅជូនចៅក្រមស៊ើបសួរ ដើម្បីបន្ដនីតិវិធី។
លោក ទិន សុចិត្រា អ្នកនាំពាក្យ អយ្យការអមសាលាដំបូងខេត្តកណ្ដាល បានឲ្យដឹង នៅរសៀល ថ្ងៃទី២៥ ខែកុម្ភៈ ឆ្នាំ២០២១ថា លោក ពេជ្រ ម៉ារ៉ែន ចៅក្រមស៊ើបសួរ នៃសាលាដំបូងខេត្តកណ្ដាល បានចេញដីកាបង្គាប់ឲ្យឃុំខ្លួ ជនត្រូវចោទ តុង ដារ៉ា ជាមន្ដ្រីពន្ធនាគារ ដាក់ពន្ធនាគារជាបណ្ដោះអាសន្ន ដើម្បីរង់ចាំបើកសវនាការ នាពេលក្រោយ។
លោក តុង ដារ៉ា ជាមន្ត្រីពន្ធនាគារខេត្តកណ្ដាល ត្រូវបានកម្លាំងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកណ្ដាល ឃាត់ខ្លួន ក្រោយទទួលពាក្យបណ្ដឹងពីជនរងគ្រោះម្នាក់ ពីបទឆបោក ក្រោយទទួលប្រាក់របស់ជនរងគ្រោះ ដើម្បីរត់ការដោះលែងមនុស្សចេញពីពន្ធនាគារ។ ប៉ុន្តែលោក តុង ដារ៉ា មិនបានធ្វើតាមការចង់បានរបស់ជនរងគ្រោះ ហើយលុយក៏មិនព្រមសងវិញដែរ។
លោក តុង ដារ៉ា ជាមន្ត្រីពន្ធនាគារ ល្បីល្បាញខាងផ្នែករត់ការដោះលែងមនុស្ស ចេញពីពន្ធនាគារ មិនថារឿងតូច ឬរឿងធំ ឬរឿងកម្រិតណាឡើយ គឺគាត់បានឃុបឃិតជាមួយមនុស្សពាក់ព័ន្ធមួយចំនួនផ្សេងទៀត ដើម្បីសូកលុយកាក់ ក្នុងការរត់ការដោះលែងមនុស្ស ចេញពីពន្ធនាគារ។ ប៉ុន្ដែសកម្មភាពបែបនេះ មានអ្នកដឹងរឿងច្បាស់ បានប្រាប់ថា គាត់ានធ្វើឡើង អស់រយៈពេលយូរមកហើយ ហើយទើបតែពេលនេះអស់លក្ខណ៍ ក៏ត្រូវសមត្ថកិច្ចឃាត់ខ្លួនតែម្ដង៕
