សមត្ថកិច្ចក្តាប់បានមុខសញ្ញាបណ្តើរៗហើយ ចំពោះករណីបាញ់សម្លាប់មនុស្ស នៅក្នុងបុរីប៊ុនហួរ

ភ្នំពេញ ៖ ករណីឃាតកម្ម បាញ់សម្លាប់មនុស្សពីរនាក់ និងរបួសម្នាក់ នៅចំណុចមុខហាងលក់ទូរសព្ទ័ ពន្លកថ្មី ក្នុងបុរីប៊ុនហួរ ភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ កាលពីថ្ងៃទី១១ ខែកុម្ភៈ ឆ្នាំ២០២១។ ខណៈពេលនេះ សមត្ថកិច្ចក្តាប់បានមុខសញ្ញាបណ្តើរៗហើយ។

យោងតាមសេចក្តីអំពាវនាវចុងក្រោយរបស់អាវុធហត្ថរាជធានីភ្នំពេញបានឲ្យដឹងថា ដោយយោងទៅលើឃ្លីបវីដេអូ ដែលបានផ្សព្វផ្សាយក្នុងបណ្តាញសង្គម សមត្ថកិច្ចក្តាប់បានមុខសញ្ញាបណ្តើរៗហើយ ក្នុងនោះឃើញថា មានតែជនល្មើសដៃដល់ម្នាក់គត់ដែលឃោរឃៅមិនអាចលើកលែងបាន រីឯបក្ខពួកផ្សេងទៀត មានការពាក់ព័ន្ធស្រាល ហើយម្ចាស់កាំំភ្លើងក៏ឃើញថាមិនបានចូលរួមវាយតប់ជាមួយគេ និងបានព្យាយាមរារាំងជនដៃដល់ មកទាញដណ្តើមកាំភ្លើងផងដែរ។ ដូច្នេះដើម្បីជៀសវាងការផ្តន្ទាទោសធ្ងន់ធ្ងរ សមត្ថកិច្ចសូមអំពាវនាវជាលើកចុងក្រោយ ចំពោះអ្នកដែលបានចូលរួមធ្វើសកម្មភាពជាមួយជនដៃដល់ សូមចេញមុខសារភាព នោះនឹងទទួលបានការសម្រាលទោសពីច្បាប់។ ចំពោះសាធារណៈជនទាំងឡាយណា ដែលបានឃើញឬស្គាល់ឬមានដំណឹងរបស់ជនសង្ស័យ សូមរាយការណ៍ មកកាន់មន្ត្រីកងរាជអាវុធហត្ថរាជធានីភ្នំពេញ ដែលមានទូរស័ព្ទលេខ៖ 012 383 383 012 66 77 98 017 81 81 71 ឬរាយការណ៍ទៅកាន់សមត្ថកិច្ចដែលនៅជិតលោកអ្នកបំផុត សមត្ថកិច្ចនឹងធានា រក្សាការសម្ងាត់ជូន។

មន្ត្រីប៉ូលិសបានឲ្យដឹងថា នៅក្នុងករណីឃាតកម្មនេះ គឺបណ្តាលឲ្យមនុស្សចំនួន ២នាក់ស្លាប់ និងរបួសធ្ងន់ម្នាក់។ តាមរយៈកាម៉ារ៉ាសុវត្ថិភាពននៅកន្លែងកើតហេតុ សមត្ថកិច្ចមានតម្រុយខ្លះហើយ ក្នុងការតាមស្វែងរកក្រុមជនដៃដល់។

ជនរងគ្រោះទាំងបីនាក់ ដែលត្រូវបានខ្មាន់កាំភ្លើងបាញ់ឲ្យស្លាប់ និងរបួសមានដូចជាៈ

១. ឈ្មោះ សុខ ស៊ីដេត ភេទប្រុស អាយុ៤១ឆ្នាំ មុខរបរលក់ខោអាវ ទីលំនៅភូមិអង្គរ ឃុំអង្គរ ស្រុកកងមាស ខេត្តកំពង់ចាម ស្នាក់នៅផ្ទះជួល ផ្លូវបេតុង ភូមិព្រៃព្រីងខាងត្បូង១ សង្កាត់ចោមចៅ២ ខណ្ឌពោធិ៍សែនជ័យ ត្រូវគ្រាប់កាំភ្លើងចូលនៅកខាងស្តាំធ្លាយចេញនៅកខាងឆ្វេង (ស្លាប់)។

២. ឈ្មោះ គឹម ឈៀកលីន ភេទប្រុស អាយុ៤២ឆ្នាំ ទីលំនៅភូមិជីបាន ឃុំជីបាន ស្រុកស្រីសន្ធរ ខេត្តកំពង់ចាម ស្នាក់នៅផ្ទះជួលសង្កាត់ចោមចៅ២ ខណ្ឌពោធិ៍សែនជ័យ។ គ្រាប់កាំភ្លើងត្រូវចំក្បាលខាងក្រោយចំហៀងខាងឆ្វេងធ្លាយចេញនៅក្បែរចុងចិញ្ចើមខាងស្តាំ (ស្លាប់)។

៣. ឈ្មោះ ប៉ូ សុធី ភេទប្រុស អាយុ៤៧ឆ្នាំ សង្គ្រោះបន្ទាន់នៅមន្ទីរពេទ្យមិត្តភាពខ្មែរសូវៀត។

ប្រភពបានបន្តថា ក្រុមខ្មាន់កាំភ្លើងមានគ្នាចំនួន ៥នាក់ បានរត់គេចខ្លួន បន្ទាប់ពីធ្វើសកម្មភាពបាញ់ស្លាប់ជនទៅលើជនរងគ្រោះ។
នៅកន្លែងកើតហេតុបានរកឃើញសំបកគ្រាប់អាវុធខ្លី៣គ្រាប់។ហើយសមត្ថកិច្ចកំពុងតែតាមចាប់ខ្លួនដើម្បីយកមកផ្តន្ទាទោសតាមច្បាប់។

ជនរងគ្រោះឈ្មោះ ប៉ូ សុធី ភេទប្រុស អាយុ៤៧ឆ្នាំ បានឲ្យដឹងថា នៅមុនពេលកើតហេតុខ្លួន និងឈ្មោះ ស៊ីដេត ឈ្មោះ ឈៀកលីន ព្រមទាំងមិត្តភក្តិជាច្រើននាក់ បានអង្គុយផឹកស៊ីនៅមុខផ្ទះឈ្មោះ មុន្នី ពេលនោះស្រាប់តែមានអ្នកបើកកង់បីឥណ្ឌាពណ៌ស បានបើកមកដល់មុខកន្លែងផឹកស៊ីទៅមុខទៀតមិនរួចព្រោះមានរថយន្តម៉ាកស្តារិចចតបាំងផ្លូវ ហើយអ្នកបើកកង់បីក៏បានទាស់ពាក្យសំដីជាមួយម្ចាស់រថយន្តស្តារិច ពេលនោះពួកខ្លួនក៏បានដើរចូលទៅឃាត់។ នៅពេលនោះអ្នកបើកកង់បីបានទូរស័ព្ទទៅហៅប្ខពួកមក ពេលបក្ខពួកអ្នកបើកកង់បីមកដល់ក៏បានចូលមកវ៉ៃគ្នាជាមួយពួកខ្លួន ហើយបានបាញ់ចំឈ្មោះ ស៊ីដេត និងឈ្មោះ ឈៀក លីន បណ្តាលឲ្យដួលនឹងដី ហើយក៏បានបាញ់មកលើខ្លួនមួយគ្រាប់រងរបួសបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរសូវៀត។

អ្នកនាំពាក្យអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ឆាយ គឹមខឿន បានបញ្ជាក់ថា ករណីនេះ បានបណ្តាលឲ្យមនុស្សចំនួនពីរនាក់ស្លាប់ និងម្នាក់រងរបួស។ សមត្ថកិច្ចកំពុងតែរកប្រភពនៃរឿង និងកំពុងតែតាមស្វែងរកចាប់ខ្លួនក្រុមជនដៃដល់៕