ទីក្រុងតៃប៉ិ៖ បើតាមសារព័ត៌មាន CNA បានចេញផ្សាយ ថា លោកស្រី សៃ អ៊ីងវ៉ិន (Tsai Ing-wen) ប្រធានាធិបតីតៃវ៉ាន់ កាលពីថ្ងៃទី៤ ខែធ្នូ ឆ្នាំ២០២០ បានថ្លែងថា កិច្ចព្រមព្រៀងពាណិជ្ជកម្មទ្វេភាគី រវាងតៃវ៉ាន់ និងសហរដ្ឋអាមេរិក នឹងជួយពង្រឹងការគាំទ្ររបស់សហរដ្ឋអាមេរិក ដើម្បីទប់ទល់នឹងការគំរាមកំហែងពីសំណាក់ប្រទេសចិន។
ទោះជាយ៉ាងណា រហូតមកដល់ពេលនេះ រដ្ឋាភិបាលទីក្រុងប៉េកាំង នៅតែចាត់ទុកដែនកោះតៃវ៉ាន់ ជាអាណាខេត្តរបស់ខ្លួន។ ជាញឹកញាប់ ចិនតែងតែគំរាមកំហែងលើរដ្ឋាភិបាលតៃប៉ិ ដោយប្រើប្រាស់កងទ័ពវាយកម្ទេចលើដែនកោះនេះ ប្រសិនបើតៃវ៉ាន់ ប្រកាសឯករាជភាពរបស់ខ្លួន ផ្ដាច់ចេញពីប្រទេសចិន។ ដោយសារតែការគំរាមកំហែងមិនចេះចប់ពីសំណាក់រដ្ឋាភិបាលចិន ទើបរដ្ឋាភិបាលទីក្រុងតៃប៉ិ បង្កើនការចំណាយរាប់ពាន់លានដុល្លារ សម្រាប់ទិញយន្ដហោះចម្បាំង និងគ្រឿងសព្វាវុធទំនើបៗពីសហរដ្ឋអាមេរិក យកមកទុកធ្វើសង្រ្គាមជាមួយចិន។
រហូតមកដល់ពេលនេះ កោះតៃវ៉ាន់ បាន និងកំពុងសម្លឹងមើលកិច្ចព្រមព្រៀងពាណិជ្ជកម្មសេរីជាមួយសហរដ្ឋអាមេរិក ដែលជាអ្នកគាំទ្រ និងផ្គត់ផ្គង់គ្រឿងសឹកដ៏សំខាន់បំផុតសម្រាប់ដែនកោះមួយនេះ។ ជាមួយគ្នានេះដែរ កាលពីខែសីហា កន្លងទៅ លោកស្រី Tsai បានប្រកាសបន្ធូរបន្ថយការនាំចូលសាច់ជ្រូក និងសាច់គោពីសហរដ្ឋអាមេរិក បើទោះជាមានការតវ៉ា ពីគណបក្សប្រឆាំង និងពលរដ្ឋតៃវ៉ាន់ រហូតមានការប្រទូសរ៉ាយ ដោយគប់គ្រឿងក្នុងជ្រូកពេញរដ្ឋសភា។
លោកស្រី ប្រធានាធិបតីតៃវ៉ាន់ បានបញ្ជាក់ថា កោះតៃវ៉ាន់ពឹងផ្អែកលើពាណិជ្ជកម្ម។ ដូច្នេះយើងត្រូវតែពង្រឹងទំនាក់ទំនងសេដ្ឋកិច្ចជាមួយដៃគូពាណិជ្ជកម្មរបស់យើង។ លោកស្រីបានទន្ទឹងរង់ចាំពីការរីកចម្រើន លើកិច្ចព្រមព្រៀងពាណិជ្ជកម្មទ្វេភាគី ជាមួយសហរដ្ឋអាមេរិក ដែលជាដៃគូពាណិជ្ជកម្មធំទី២ និងជាសម្ព័ន្ធមិត្តផ្នែកសន្តិសុខ ដ៏សំខាន់បំផុត។ ក្រៅពីនេះ លោកស្រីបានថ្លែងអំណរគុណ សម្រាប់ការគាំទ្រ ពីអ្នកនយោបាយអាមេរិក ទាំងពីរគណបក្ស ចំពោះកិច្ចព្រមព្រៀងបែបនេះ។
ប្រធានាធិបតីអាមេរិកជិតផុតអាណត្ដិ លោក ដូណាល់ ត្រាំ បានក្លាយជាមនុស្សដ៏មានប្រជាប្រិយភាពមួយ នៅលើកោះតៃវ៉ាន់ ដោយសារលោកបានចុះកិច្ចព្រមព្រៀងលក់អាវុធថ្មីៗ និងការបញ្ជូនមន្ត្រីជាន់ខ្ពស់ នៅក្នុងរដ្ឋបាលរបស់លោក ឲ្យធ្វើដំណើរទស្សនកិច្ចផ្លូវការនៅលើដែនកោះមួយនេះ ដោយមិនញញើតនឹងរដ្ឋាភិបាលទីក្រុងប៉េកាំងនោះឡើយ។ ជាមួយគ្នានេះដែរ កោះតៃវ៉ាន់បានបង្ហាញនូវទំនុកចិត្តថា រដ្ឋាភិបាលថ្មីរបស់ប្រធានាធិបតីជាប់ឆ្នោត លោក ចូ បៃដិន នឹងនៅតែគាំទ្រកោះតៃវ៉ាន់បន្ដទៀត៕
