បើតាមសារព័ត៌មានចិន South China Morining Post (Scmp) បានចេញផ្សាយ កាលពីថ្ងៃទី៩ ខែវិច្ឆិកា ឆ្នា២០២០ តាមក្រុមអ្នកវិភាគ បានលើកឡើងថា ប្រធានាធិបតីជាប់ឆ្នោត លោក ចូ បៃដិន នឹងនៅតែប្រកាន់គោលជំហរយ៉ាងម៉ឺងម៉ាត់ ជុំវិញបញ្ហាជម្លោះ នៅក្នុងសមុទ្រចិនខាងត្បូង។ បើទោះជារដ្ឋការរបស់លោក ចូ បៃដិន នឹងមានលក្ខណៈជាស៊ីវិល ជាងរដ្ឋការរបស់លោក ដូណាល់ ត្រាំ ប្រធានាធិបតីអាមេរិកក្ដី ប៉ុន្ដែរដ្ឋាភិបាលទីក្រុងវ៉ាស៊ីនតោន នឹងនៅតែបន្តគោលការណ៍សេរីភាព នៃការធ្វើនាវាចរណ៍ តាមផ្លូវទឹក នៅលើដែនសមុទ្រជម្លោះនេះដដែល។
លោក ចូ បៃដិន កាលពីប៉ុន្មានឆ្នាំមុននេះ ធ្លាប់រិះគន់យ៉ាងខ្លាំង ចំពោះរដ្ឋាភិបាលទីក្រុងប៉េកាំង ដោយបានហៅប្រធានាធិបតីចិន លោក ស៊ី ជិនពីង ថាជាមនុស្សកំណាច ហើយថែមទាំងបានវាយប្រហារ អំពីសកម្មភាពរបស់ចិន នៅក្នុងទីក្រុង ហុង កុង និង ស៊ីនជាង (Xinjiang) ថែមទៀតផង។ បើតាមការពិនិត្យទោលើប្រវត្ដិរបស់លោក ចូ បៃដិន គឺអ្នកនយោបាយជើងចាស់ខាងកិច្ចការបរទេសផងដែរ។ ដូច្នេះ បញ្ហាចិន និអាមេរិក អាចនឹងនៅតែមានភាពតានតឹងដាក់កាន់តែខ្លាំងឡើងបន្ថែមទៀត ក៏ថាបាន។
ក្រុមអ្នកវិភាគ បានបញ្ជាក់ថា ទំនាក់ទំនងអន្តរជាតិ ក្រោមការដឹកនាំរបស់លោក ចូ បៃដិន (Joe Biden) នឹងប្រកាន់យកនូវវិធីសាស្រ្តជំរុញបែបស៊ីវិល និងការមូលមតិរួម។ ប៉ុន្តែវានៅតែជាវោហារសាស្ត្រ អស្ថិរភាពប្រឆាំងនឹងចិនដដែល។ ដូច្នេះ នៅក្នុងរដ្ឋការរបស់លោក បៃដិន ទំនងជាតានតឹង ក៏ដូច នៅក្នុងរដ្ឋការរបស់លោកប្រធានាធិបតី ដូណាល់ ត្រាំ ដដែល លើបញ្ហាជុំវិញសមុទ្រចិនខាងត្បូងនេះ។
.
លោកសាស្រ្ដាចារ្យ Jay Batongbacal នាយកវិទ្យាស្ថានកិច្ចការសមុទ្រ និងច្បាប់សមុទ្រ នៃសាកលវិទ្យាល័យហ្វីលីពីន បានថ្លែងថា បើតាមពិនិត្យមើលប្រវត្ដិវិញ លោក បៃដិន ជាតំណាងរាស្រ្ដជើងចាស់មួយរូប និងមានបទពិសោធន៍លើកិច្ចការបរទេសយ៉ាងពូកែបំផុត។ ដូច្នេះយើងនឹងយល់ឃើញកាន់តែវែងឆ្ងាយទៅមុខ ហើយវានឹងមានបញ្ហាប្រឈមកាន់តែច្រើនឡើង នៅទូទាំងពិភពលោកផងដែរ។
ជាមួយគ្នានេះដែរ លោក Carl Thayer អ្នកឯកទេសកិច្ចការអាស៊ីអាគ្នេយ៍ បានថ្លែងថា នៅក្នុងរដ្ឋការរបស់លោក ចូ បៃដិន នឹងមានសម្ពាធតិចតួច មកលើប្រទេសនានា នៅក្នុងតំបន់អាស៊ាន។ ប៉ុន្ដែបញ្ហាតានតឹង រវាង ចិន និងអាមេរិក អាចនឹងខ្លាំងឡើង៕
