ព្យុះកំណាចត្រូពិក វាយប្រហារប្រទេសវៀតណាម ស្លាប់និងបាត់ខ្លួនជាង៥០នាក់

រដ្ឋធានីហាណូយ៖ ព្យុះកំណាចត្រូពិក (ទីហ្វុងម៉ូឡាវ) កាលពីថ្ងៃទី២៨ ខែតុលា ឆ្នាំ២០២០ បានវាយប្រហារទៅលើប្រទេសវៀតណាម យ៉ាងខ្លាំង បណ្ដាលឲ្យមនុស្សចំនួន១៣នាក់ស្លាប់ និង៥០នាក់កំពុងបាត់ខ្លួន នៅឡើយ។

បើតាមសារព័ត៌មានសិង្ហបុរី បានផ្សាយ នៅព្រឹក ថ្ងៃទី២៩ ខែតុលា ឆ្នាំ២០២០ ថា វៀតណាម បានដាក់ពង្រាយយោធា និងគ្រឿងចក្រធំៗ សម្រាប់ចេញប្រតិបត្តិការជួយសង្គ្រោះជនរងគ្រោះ នៅក្នុងហេតុការណ៍គ្រោះទឹកជំនន់ និងការរអិលបាក់ដី បង្កឡើង ដោយព្យុះទីហ្វុងម៉ូឡាវ។

ដោយឡែកអាជ្ញាធរវៀតណាម បានឲ្យដឹងថា កាលពីថ្ងៃទី២៨ ខែតុលា មានមនុស្ស ចំនួន១៣នាក់ស្លាប់ និង ៤០នាក់កំពុងបាត់ខ្លួន នៅក្នុងករណីបាក់ដី នៅក្នុងខេត្ត ក្វាងណាម (Quang Nam) ។ ព្យុះទីហ្វុង Molave ចាប់ផ្តើមបោកបក់មកលើតំបន់ភាគកណ្តាលវៀតណាម នៅក្នុងល្បឿនលឿន១៥០គីឡូម៉ែត្រ ក្នុងមួយម៉ោង ហើយវាបានបង្កឲ្យមានភ្លៀងធ្លាក់យ៉ាងខ្លាំង នៅតំបន់នោះ។

លោក ទ្រិញ ឌិញដុង (Trinh Dinh Dung) ឧបនាយករដ្ឋមន្ត្រីវៀតណាម បានឲ្យដឹងថា «យើងអាចព្យាករ អំពីកម្លាំងព្យុះ និងកម្រិតទឹកភ្លៀង ប៉ុន្ដែយើងមិនអាចព្យាករ អំពីហេតុការណ៍បាក់ដីបានឡើយ»។ ដីបានបាក់មកលាយឡំជាមួយនឹងទឹកភ្លៀង ហើយក្លាយជាល្បាប់ភក់ រហូរចុះមកលើផ្លូវថ្នល់ ជាពិសេស នៅក្នុងខេត្តក្វាងណាម។ ដោយសារតែគ្រោះធម្មជាតិនេះ ទើបអាជ្ញាធរវៀតណាមបានបញ្ជូនកងកម្លាំងសង្គ្រោះវៀតណាម យកគ្រឿងចក្រ មកដោះស្រាយបញ្ហាជាបន្ទាន់។

បើតាមរបាយការណ៍បឋមរបស់រដ្ឋាភិបាលវៀតណាម បានឲ្យដឹងថា ព្យុះទីហ្វុង Molave បានបង្ខំឲ្យប្រជាជនជាង ១លាននាក់ភៀសខ្លួន ហើយរាប់លាននាក់គ្មានអគ្គិសនីប្រើប្រាស់ និងផ្ទះប្រជាជនជាង ៥៦០០០ខ្នង រងការបំផ្លាញ ឬខូចខាត។ ដោយឡែកអ្នកនេសាទសរុប ២៦នាក់ កំពុងបន្តបាត់ខ្លួន ក្រោយទូកនេសាទរបស់ពួកគេលិច នៅក្នុងសមុទ្រ ហើយរហូតមកដល់ពេលនេះ នាវាកងទ័ពជើងទឹកវៀតណាម កំពុងបន្តស្វែងរក៕