ខេត្តបន្ទាយមានជ័យ៖ បុរសស្រវឹងខួបម្នាក់ទាញកាំបិត ដេញកាប់អ្នកភូមិ រត់ពេញស្រុក ហើយបន្ដដេញកាប់រថយន្ដរបស់អ្នកដទៃ ក៏ត្រូវកម្លាំងនគរបាល ចុះទៅបង្ក្រាប និងឃាត់ខ្លួន កាលពីវេលាម៉ោង៤ និង៣០នាទីល្ងាច ថ្ងៃទី២៧ ខែតុលា ឆ្នាំ២០២០ នៅភូមិវាលហាត់ ឃុំម៉ាឡៃ ស្រុកម៉ាឡៃ។
មន្រ្ដីនគរបាលមូលដ្ឋាន បានឲ្យដឹងថា ជនសង្ស័យ ឈ្មោះ សៀង វាសនា អាយុ៣៦ឆ្នាំ រស់នៅភូមិវាលហាត់ ឃុំ-ស្រុកម៉ាឡៃ ខេត្តបន្ទាយមានជ័យ។ ជននេះតែងតែផឹកស្រាជាប្រចាំ ហើយនៅពេលស្រវឹងម្ដងៗ គេតែងតែមានចរិតកាចសាហាវ ទាញកាំបិតគំរាមកំហែង និងដេញកាប់អ្នកភូមិ ហើយមិនមានអ្នកណាម្នាកហ៊ានប្ដឹងទៅសមត្ថកិច្ចនោះដែរ ព្រោះខ្លាចជនកម្រោល៤ជ្រុងនេះ សងសឹក។
មន្រ្ដីនគរបាលដដែល បានបន្ដថា ដោយសារតែពលរដ្ឋរស់នៅក្នុងភូមិខ្លាចរអារបែបនេះ រឹតតែធ្វើឲ្យជនសង័្សយកាន់តែបានចិត្ត។ លុះមកដល់ថ្ងៃកើតហេតុ ក្រោយពេលផឹកស្រវឹងហើយ ជនសង្ស័យបានទាញកាំបិតខ្វែវ កាប់រថយន្ត១គ្រឿង ម៉ាកកាមរី ពណ៌ស ពាក់ស្លាកលេខ បាត់ដំបង 2A-1091 ជាកម្មសិទ្ធរបស់ឈ្មោះ អឿ សាវឿន ភេទប្រុស អាយុ៧១ឆ្នាំ រស់នៅភូមិវាលហាត់ ឃុំម៉ាឡៃ ដែលចតទុកចោល បណ្តាលឲ្យបែកស្តុបខាងក្រោយ ផ្នែកខាងឆ្វេង។ បន្ទាប់មក ជនកម្រោល៤ជ្រុងនេះបានបញ្ចេញកំហឹង ដេញកាប់ពលរដ្ឋឈ្មោះ ជ័យ ជីម ភេទប្រុស អាយុ៦៧ឆ្នាំបន្ដទៀត។ ប៉ុន្ដែជនរងគ្រោះបានរត់គេចខ្លួនទាន់ ហើយជនបង្ក ក៏បន្តទៅដេញកាប់ឈ្មោះ អឿ សាវឿន ជាម្ចាស់រថយន្តបន្ថែមទៀត បណ្តាលឲ្យរងរបួសស្រាល ចំនួន២កន្លែង។
មន្រ្ដីនគរបាលដដែល បានបន្ដថា ភ្លាមៗនោះ ប្រជាពលរដ្ឋបានរាយការណ៍មកសមត្ថកិច្ច ទើបកម្លាំងនគរបាលស្រុក និងមូលដ្ឋាន បានចុះទៅឃាត់ខ្លួនជនសង័្សយតែម្ដង។ ក្រោយមក សមត្ថកិច្ចក៏បានបញ្ជូនជនសង្ស័យទៅកាន់អធិការដ្ឋាននគរបាលស្រុកម៉ាឡៃ ដើម្បីរៀបចំសំណុំរឿង បញ្ជូនខ្លួនទៅកាន់ស្នងការដ្ឋាននគរបាលខេត្ត កសាងសំណុំរឿងបញ្ជូនទៅកាន់សាលាដំបូងខេត្ត ចាត់ការតាមនីតិវិធី៕
