ខេត្តបន្ទាយមានជ័យ៖ បើតាមរបាយការណ៍បឋមរបស់មន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ បាឲ្យដឹងថា បើគិតត្រឹមថ្ងៃទី២៨ ខែតុលា ឆ្នាំ២០២០ ផ្ទៃដីដំណាំស្រូវ រងផលប៉ះពាល់ ពីទឹកជំនន់ មានចំនួន ៧១ ៤៨៩ហិកតា រួមមាន ស្រូវស្រាល ស្រូវដើមរដូវ ស្រូវកណ្តាល ស្រូវឡើងទឹក និងស្រូវធ្ងន់ ក្នុងនោះមានផ្ទៃដីខូចខាតមាន ចំនួន ១៥ ៧០៨ហិកតា។ ក្រៅពីដំណាំស្រូវន គ្រោះទឹកជំនន់ នៅក្នុងខេត្តបន្ទាយមានជ័យ ក៏បានបង្កផលប៉ះពាល់ដល់ដំណាំកសិ-ឧស្សាហកម្ម (ដំឡូងមី និងពោត ក្រហម) និងដំណាំបន្លែ សរុបផ្ទៃដីប៉ះពាល់មានចំនួន ១២៥៥៧ហិកតា ក្នុងនោះផ្ទៃដីខូចខាត មានចំនួន ១០៤៤ហិកតា។
ជាមួយគ្នានេះដែរ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីព្រឹក ថ្ងៃទី២៨ ខែតុលា ឆ្នាំ២០២០ បានអញ្ជើញមកជួបសំណេះសំណាល និងបាននាំយកពូជស្រូវ ចំនួន២៩ ៨០០គីឡូក្រាម ទៅចែកជូនប្រជាកសិករ រងគ្រោះចំនួន ២៩៨គ្រួសារ (១០០គ.ក្រ/គ្រួសារ)។ រីឯពិធីនេះបានរៀបចំឡើង នៅក្នុងបរិវេណវត្តចារ ភូមិរហាត់ទឹក ឃុំរហាត់ទឹក ស្រុកមង្គលបុរី។
លោករដ្ឋមន្ត្រី ក្នុងនាមសម្តេចតេជោ ហ៊ុន សែន នាយករដ្ឋមន្រ្តី បានសម្តែងនូវអារម្មណ៍សោកស្តាយ និងចូលរួមរំលែកទុក្ខជាមួយបងប្អូនជនរងគ្រោះ ដោយសារគ្រោះធម្មជាតិ នៅទូទាំងប្រទេស និងជាពិសេសបងប្អូន នៅទូទាំងខេត្តបន្ទាយមានជ័យ។ ក្នុងនាមក្រសួងផលិតស្បៀង នៅពេលនេះផលិតកម្មស្បៀងមួយចំនួន ត្រូវបានទទួលនូវផលប៉ះពាល់ និងមួយចំនួនទៀតខូចខាត។ ហេតុនេះ លោករដ្ឋមន្ត្រី ក្នុងនាមថ្នាក់ដឹកនាំក្រសួង បានលើកទឹកចិត្ត គាំទ្រ និងជំរុញឲ្យប្រជាពលរដ្ឋចាប់ផ្តើមស្តារផលដំណាំឡើងវិញ តាមគ្រប់រូបភាព ជាពិសេសដំណាំស្រូវទៅតាមលទ្ធភាព ដោយមានមន្ទីរកសិកម្ម រុក្ខាប្រមាញ់ និងនេសាទ អគ្គនាយកដ្ឋានកសិកម្ម នាយកដ្ឋានដំណាំស្រូវ នាយកដ្ឋានសាកវប្បកម្ម ជួយសហការ និងត្រូវបន្តចុះមកវាយតម្លៃលើផលប៉ះពាល់ និងជំរុញផលិតកម្មស្បៀងឡើងវិញបន្ទាប់ពីទឹកស្រកចុះ។
លោករដ្ឋមន្ត្រីបានបញ្ជាក់ថា ការចែកជូននេះ វាគ្រាន់តែជាអំណោយបឋមសម្រាប់ស្តារ ផលិតកម្មស្បៀងឡើងវិញប៉ុណ្ណោះ ប៉ុន្តែអ្វីដែលសំខាន់ជាងនេះ គឺលោករដ្ឋមន្ត្រី ជាពិសេសសម្តេចតេជោបានផ្ញើជូននូវក្តីសង្ឃឹម លើក ទឹកចិត្ត និងជំរុញឲ្យប្រជាកសិករត្រូវខិតខំពង្រីកសកម្មភាពស្តារដំណាំស្រូវ ចិញ្ចឹមសត្វ ត្រី កង្កែប ដាំបន្លែ និងដំ ណាំរួមផ្សំឲ្យកាន់តែសកម្មទ្វេឡើងថែមទៀត ដើម្បីសមាជិកបណ្តុំគ្រប់ៗគ្រួសារមានស្បៀងហូបចុកគ្រប់គ្រាន់ ក្នុងបរិបទនៃគ្រោះធម្មជាតិ ដែលយើងកំពុងប្រឈម ហើយពិតណាស់រាជរដ្ឋាភិបាល ដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការនឹងនៅរង់ចាំផ្តល់ការជួយឧបត្ថម្ភ និងគាំទ្រគ្រប់ពេលវេលា ដោយមិនអនុញ្ញាតឲ្យប្រជាកសិករយើងណាម្នាក់ស្លាប់ ដោយសារខ្វះស្បៀងបានឡើយ។
ដោយឡែក គណៈកម្មាធិការជាតិគ្រប់គ្រងគ្រោះមហន្តរាយ បានចេញរបាយការណ៍របស់ខ្លួនថា បើគិតត្រឹម ថ្ងៃទី២៦ ខែតុលា ឆ្នាំ២០២០ ចំនួនអ្នកស្លាប់ ដោយសារគ្រោះទឹកជំនន់ បានកើនឡើង រហូតដល់ ៤៣នាក់ ក្នុងនោះខេត្តបន្ទាយមានជ័យ មានអ្នកស្លាប់រហូតដល់២៦នាក់។
គណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ នៅក្នុងរបាយការណ៍របស់ខ្លួនថា ប្រជាពលរដ្ឋដែលស្លាប់ដោយសារគ្រោះទឹកជំនន់ទាំងនោះ រួមមាន៖ បន្ទាយមានជ័យ ចំនួន២៦នាក់, ពោធិ៍សាត់ ៦នាក់, ប៉ៃលិន ១នាក់, ព្រះសីហនុ ២នាក់, កំពង់ធំ ៦នាក់, ស្ទឹងត្រែង ១នាក់ និងកំពង់ឆ្នាំង ១នាក់។ គ្រោះទឹកជំនន់នេះ បានបង្កផលប៉ះពាល់ដល់រាជធានី-ខេត្ត ចំនួន២០ រួមមាន៖ ពោធិ៍សាត់ ប៉ៃលិន បន្ទាយមានជ័យ ភ្នំពេញ បាត់ដំបង ស្វាយរៀង ត្បូងឃ្មុំ ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងកំពង់ធំ។
គណៈកម្មាធិការជាតិគ្រប់គ្រងគ្រោះមហន្តរាយ បានបន្ថែមថា គ្រោះទឹកជំនន់នេះ បានធ្វើឱ្យប៉ះពាល់ដល់ប្រជាពលរដ្ឋ ជិត១៥ម៉ឺនគ្រួសារ ស្មើនឹងជិត ៦០ម៉ឺននាក់។ រីប្រជាពលរដ្ឋ ជាង១ម៉ឺនគ្រួសារ ស្មើនឹងជិត ៥ម៉ឺននាក់ ត្រូវបានជម្លៀសទៅរកទីទួលមានសុវត្ថិភាព។ ក្រៅពីនេះ គ្រោះទឹកជំនន់នេះ បង្កឱ្យប៉ះពាល់ដល់ផ្ទះសម្បែង ជាង១៣ម៉ឺនខ្នង និងខូចខាត ៦៣ខ្នង, លិចសាលារៀន ៩៥១កន្លែង និងលិចវត្ត ៣០៧កន្លែង។
គណៈកម្មាធិការជាតិគ្រប់គ្រងគ្រោះមហន្តរាយ បានបន្ដថា ទឹកជំនន់បានប៉ះពាល់ផ្លូវជាតិ ផ្លូវខេត្ត ផ្លូវក្រួសក្រហម ៦១៧គីឡូម៉ែត្រ, លិចផ្លូវលំជនបទ ១ ៦៨៥គីឡូម៉ែត្រ, ប៉ះពាល់ទំនប់ ៤៩គីឡូម៉ែត្រ, ប៉ះពាល់ប្រឡាយមេ ២៧០គីឡូម៉ែត្រ, ប៉ះពាល់ប្រឡាយរង ២៧១គីឡូម៉ែត្រ, ប៉ះពាល់ប្រឡាយស្រោចស្រព ១៤៦គីឡូម៉ែត្រ និងប៉ះពាល់ច្រាំងទន្លេជាង ២គីឡូម៉ែត្រ។ ក្រៅពីនេះ គ្រោះទឹកជំនន់នេះ បានជន់លិចស្រូវ ២៧២ ២៦៣ហិកតា និងដំណាំរួមផ្សំ ៩៦ ៩៤៥ហិកតា៕
