ខេត្តបន្ទាយមានជ័យ៖ បុរសកំណាចម្នាក់លែងលះជាមួយនឹងប្រពន្ធម្ដងជា២ដងហើយ តែនៅចង់បាននាងជាប្រពន្ធបន្ដទៀត លុះពេលនាងមិនឱបថើប ក៏ផ្ទុះកំហឹងយ៉ាងក្រេវក្រោធ ទាញកាំបិតកាប់ប្រហារទៅលើនាង បណ្ដាលឲ្យរងរបួសធ្ងន់ កាលពីវេលាម៉ោង៩យប់ ថ្ងៃទី១១ ខែកញ្ញា ឆ្នាំ២០២០ នៅក្នុងភូមិសាលាឆេះ ឃុំរហាល ស្រុកព្រះនេត្រព្រះ។
លោកវរសេនីយ៍ឯក មាស ប្ញទ្ធី អធិការនគរបាលស្រុកព្រះនេត្រព្រះ បានឲ្យដឹងថា ជនរងគ្រោះ ឈ្មោះ ឃាង ឆវី អាយុ៤៨ឆ្នាំ រស់នៅភូមិសាលាឆេះ ឃុំរហាល ស្រុកព្រះនេត្រព្រះ ខេត្តបន្ទាយមានជ័យ។ ចំណែកជនសង័្សយ ឈ្មោះ ហាន តៃ អាយុ៤៩ឆ្នាំ។
លោកអធិការ បានបញ្ជាក់ថា ស្ត្រីរងគ្រោះ និងជនដៃដល់ជាប្តី បានធ្វើលិខិតលែងលះគ្នា កាលពីថ្ងៃទី២៨ ខែសីហា ឆ្នាំ២០២០ ដោយបាននាំគ្នាទៅផ្តិតមេដៃ នៅផ្ទះរបស់លោកមេភូមិ ដោយបុរសជាប្តីសុខចិត្ត ចុះចេញពីផ្ទះហើយ ទៅរស់នៅជាមួយប្អូន មានផ្ទះជិតជនរងគ្រោះ។ រីឯស្ត្រីរងគ្រោះរស់នៅតែម្នាក់ឯង ចំណែកកូនចំនួន៣នាក់ បានទៅធ្វើការ នៅប្រទេសថៃ អស់ហើយ។
លោកអធិការនគរបាល បានបន្ថែមថា ក្រោយពេលលែងលះគ្នា ជនសង័្សយបាននាំស្រីស្នេហ៍មកដេក នៅក្នុងផ្ទះ ខណ:ជនរងគ្រោះទៅធ្វើការជាមួយកូន នៅប្រទេសថៃ ដើម្បីរកលុយ មកដោះបំណុលគេ។ ដោយឡែកជនសង័្សយវិញ នៅពេលប្រពន្ធ និងកូនផ្ញើលុយមកឲ្យប្តីសងគេ បែរជាយកលុយទៅនាំស្រីស្នេហ៍មកដេកនៅលើផ្ទះយ៉ាងសប្បាយទៅវិញ។ លុះពេលប្រពន្ធមកពីប្រទេសថៃ វិលត្រឡប់ចូលដល់ផ្ទះវិញ ឃើញប្តីនាំស្រីមកដេកក្នុងផ្ទះបែបនេះ ក៏មិនបាននិយាយស្តីអ្វីដែរ។ ប៉ុន្ដែជនរងគ្រោះគ្រាន់តែប្រាប់ថា បើលេងស្រី សូមចេះការពារផង ហើយជនសង័្សយក៏នាំស្រីនោះចេញទៅបាត់។
លោកអធិការបានបន្ថែមថា រយៈពេល៧ថ្ងៃក្រោយមក ជនដៃបានសុំលុយប្រពន្ធចំនួន៥ពាន់បាត ធ្វើម៉ូតូ តែនាងថា ម៉ូតូថ្មីខូចអី ធ្វើម៉ូតូមួយទៀត។ នៅពេលប្រពន្ធឲ្យលុយប្តី បែរជាគេយកលុយទៅដេកជាមួយស្រីបន្តហើយម៉ូតូក៏មិនធ្វើ ទើបផ្ទុះរឿងជម្លោះ។ ប៉ុន្ដែជនរងគ្រោះគំរាមលែងលះគ្នា ដោយឆ្អែតចិត្តនឹងទង្វើថោកទាបរបស់ប្តី ហើយក៏នាំគ្នាទៅផ្តិតមេដៃ នៅផ្ទះមេភូមិតែម្តង។ ក្រោយពេលលែងលះគ្នាហើយ បុរសជាប្តី ចង់មកផ្សះផ្សារជាមួយប្រពន្ធវិញ តែនាងមិនព្រម ហើយប្អូនបង្កើតជនដៃដល់ក៏បាននិយាយថា រឿងនេះបងទេជាអ្នកខុស តែបើចង់ជួបចែវិញ ចាំរកចាស់ទុំទៅនិយាយជាមួយចែទៅ។
ប្រភពព័ត៌មានដដែល បានបន្ដថា លុះមកដល់យប់កើតហេតុ មិត្តភក្ដិជនរងគ្រោះបានមកឌុបនាងទៅហូបបាយនៅផ្ទះរបស់គេ។ លុះពេលជនរងគ្រោះត្រឡប់មកដល់នៅមុខផ្ទះ ស្រាប់តែជនសង័្សយបានដើរតម្រង់មករក ដោយមានកាន់កាំបិតខ្វែវមួយ ហើយស្ទុះមកឱបនាងជាប្រពន្ធ ទើបបង្កឲ្យមានការប្រតាយប្រតប់គ្នា។ ភ្លាមៗនេះ ជនដៃដល់បានកាប់ប្រហារទៅលើប្រពន្ធចំនួន៥កាំបិត បណ្ដាលឲ្យរងរបួសចំមុខ ច្រមុះ ថ្គាម ស្មាខាងស្តាំ កញ្ចឹងក និងកំភួនដៃឆ្វេង បណ្តាលឲ្យរងរបួសធ្ងន់ ហើយត្រូវបានបញ្ជូនទៅមន្ទីរពេទ្យមង្គលបុរី។ ចំណែកជនសង័្សយ ក្រោយពេលធ្វើសកម្មភាពរួចហើយ ក៏កាន់កាំបិតរត់គេចខ្លួនបាត់។
ទោះជាយ៉ាងណា រហូតមកដល់ពេលនេះ សមត្ថកិច្ចកំពុងតែតាមស្រាវជ្រាវ នាំខ្លួនជនសង័្សយ មកកាត់ទោសតាមច្បាប់៕
