រាជធានីតូក្យូ៖ ក្រោយពេលលោក ស៊ីនហ្ស៊ូ អាបេ (Shinzo Abe) នាយករដ្ឋមន្រ្ដីជប៉ុន ប្រកាសលាលែងពីតំណែងនោះមក បក្សគ្រប់គ្រងអំណាចរបស់ជប៉ុន បានកំណត់យកថ្ងៃទី១៤ ខែកញ្ញា សម្រាប់ជ្រើសអ្នកស្នងតំណែងនេះ ដើម្បីដឹកនាំប្រទេសមហាអំណាចសេដ្ឋកិច្ចលេខ៣របស់ពិភពលោកបន្ដទៀត។
មន្រ្ដីជប៉ុន បានអះអាងថា គណបក្សគ្រប់គ្រងអំណាចជប៉ុន នឹងបោះឆ្នោតអ្នកស្នងតំណែងនាយករដ្ឋមន្រ្ដី លោក Shinzo Abe នៅថ្ងៃទី១៤ ខែកញ្ញា ខាងមុខនេះ។ នាយករដ្ឋមន្រ្តីថ្មី នឹងត្រូវប្រឈមមុខដោះស្រាយបញ្ហាជាច្រើន រួមមាន ការឆ្លងរាតត្បាតវីរុស សេដ្ឋកិច្ច ក៏ដូចជា ធានាថា ព្រឹត្តិការណ៍អូឡាំពិកទីក្រុងតូក្យូ ដែលត្រូវបានពន្យារពេលនោះ នឹងអាចបន្តទៅមុខបាន…ជាដើម។
គណបក្ស LDP របស់ជប៉ុន បានត្រៀមខ្លួនរួចហើយ សម្រាប់ការគាំទ្ររបស់ពួកគេ នៅពីក្រោយលោក Yoshihide Suga ដែលត្រូវគេរំពឹងថា នឹងប្រកាសជាបេក្ខភាព នៅល្ងាច ថ្ងៃទី២ ខែកញ្ញានេះ។ រីឯបេក្ខភាពចំនួន២នាក់ទៀត រួមមាន លោក Shigeru Ishiba អតីតរដ្ឋមន្រ្ដីក្រសួងការពារជាតិ និងលោក Fumio Kishida ប្រធាននយោបាយរបស់គណបក្ស LDP ជប៉ុន ក៏បានប្រកាសអំពីគម្រោងឈរឈ្មោះផងដែរ។
លោក ស៊ីនហ្ស៊ូ អាបេ ជាមេដឹកនាំម្នាក់ កាន់តំណែងនាយករដ្ឋមន្រ្ដីជប៉ុនបានយូរជាងគេ។ លោក អាបេ បានប្រកាសលាលែងពីតំណែងរបស់លោក កាលពីសប្ដាហ៍មុន ដោយសារតែបញ្ហាសុខភាព។
លោក អាបេ បានបញ្ជាក់ នៅមុនពេលលោក ប្រកាសលាលែងពីតំណែងថា «លោកមិនឲ្យសេដ្ឋកិច្ចរបស់ប្រទេសជាតិ ឈឺតាមលោកទេ»។ សម្ដីដ៏មានតម្លៃបែបនេះ បានធ្វើឲ្យប្រធានាធិបតីអាមេរិក លោក ដូណាល់ ត្រាំ កោតសរសើរថា លោក អាបេ ពិតជាមេដឹកនាំដ៏អស្ចារ្យមែន៕
