រាជធានីភ្នំពេញ៖ ក្រោយពេលមានការបង្ហោះរូបជាច្រើនសន្លឹក តាមបណ្ដាញសង្គម អំពីគូស្នេហ៍ខុសវ័យគ្នា ដូចជីតា និងចៅនោះមក ក៏មានទាំងមតិរិះគន់ និង ការកោតសរសើរថា លោកពិតជាមានសំណាងខ្ពស់មែន មាននារីវ័យក្មេងខ្ចីដ៏ស្រស់ស្អាតលង់ស្នេហា សុខចិត្តប្រគល់ប្រាណឲ្យ តែអ្នកខ្លះបែរជាពោលថា អាចមកពីទេវប្រាក់ទេដឹង ទើបនាងមានរូបស្រស់ឆោមឆាយ ព្រមឆ្លើយថា «អូនស្នេហ៍មាសបង» ។
គូសេ្នហ៍ខុសវ័យគ្នា ដូចតា និងចៅនេះ គឺកូនក្រមុំ ហ៊ីម ឆេងហួរសុដាវី និងកូនកំលោះ កែវ វិចិត្រ។ ជាការពិតណាស់ រឿងស្នេហ៍របស់មនុស្សសត្វ មិនមានការកំណត់ព្រំដែន ចាស់ ឬក្មេង មានឬក្រនោះទេ ហើយករណីនេះ មិនមែនមានតែ នៅក្នុងសម័យបច្ចុប្បន្ននេះឡើយ ពោលគឺមានចាប់តាំងពីការកកើតមនុស្សមកម៉្លេះ។ ជីវិតស្នេហ៍មិនមែនសំខាន់តែទៅលើវ័យក្មេង ឬចាស់នោះទេ ហើយអ្វីដែលប្រសើរបំផុតនោះ ការស្វែងរកសេចក្ដីសុខ និងយល់ចិត្ត ឬឲ្យតម្លៃគ្នាទៅវិញទៅមក ទើបគ្រួសារនោះមានសុភមង្គល។
បើតាមការបង្ហោះរូបភាព តាមបណ្ដាញសង្គមហ្វេសប៊ុក បានឲ្យដឹងថា មានគូសេហ៍ខុសវ័យ គ្នា ដូចតា និងចៅមួយគូ បានធ្វើពិធីភ្ជាប់ពាក្យតាមប្រពៃណីខ្មែរ កាលពីថ្ងៃទី១៩ ខែសីហា ឆ្នាំ២០២០។ នៅពេលឃើញលោកតាវ័យ ៧០ឆ្នាំ ភ្ជាប់ពាក្យជាមួយនឹងនារីខ្មែរវ័យក្មេងបែបនេះ ធ្វើឲ្យកំលោះមិនតិចទេ បានច្រណែន ហើយលើកឡើងជាពាក្យ លេងសើចថា លោកតាអើយ ទុកអនាគតឲ្យក្មេងផង? រីឯអ្នកខ្លះទៀត បានលើកឡើងថា តើលោកដាក់ស្នេហ៍ ឬក៏ប្រើទេវប្រាក់ ទើបអាចឆក់បេះដូងនារីដ៏ស្រស់ឆោមឆាយបែបនេះបាន?
ផ្ទុយទៅវិញ រឿងសុភមង្គលគ្រួសារ មិនអាស្រ័យលើវ័យទេ អ្វីដែលសំខាន់បំផុតលើការឲ្យតម្លៃ និងផ្ដល់សេចក្ដីសុខឲ្យគ្នាទៅវិញទៅមកតែប៉ុណ្ណោះ។ រីឯរឿងស្លាប់ និងរស់ គឺវានឹងវិវឌ្ឍតាមដំណើរ នៃច្បាប់ធម្មជាតិ ហើយក៏មិនប្រាកដថា ចាស់ស្លាប់មុនក្មេង តាស្លាប់មុនចៅនោះដែរ ជួនកាល ជីដូនជីតាធ្វើបុណ្យឲ្យចៅមុនក៏ថាបាន។
ទោះជាយ៉ាង សារព័ត៌មានរបស់យើងខ្ញុំ សូមត្រេកអរ និងជូនពរឲ្យគូស្វាមីទាំង២ ទទួលបានសុភមង្គល ស្រឡាញ់គ្នា រហូតគ្រាអវសាន៕
