រាជធានីភ្នំពេញ៖ បុរសម្នាក់ទើបនឹងចេញពីផឹកស្រវឹង បានបើករថយន្ដបោះពួយយ៉ាងលឿន រេចង្កូតបុកខឿនច្រាំងមាត់ទន្លេ បណ្តាលឲ្យបាក់អស់មួយផ្ទាំង ហើយរថយន្តហោះចូលទៅក្នុងទឹកទន្លេ បង្កឲ្យភ្ញាក់ផ្អើលឡើង កាលពីវេលាម៉ោង១ និង៤០នាទីរំលងធ្រាត្រ ឈានចូល ថ្ងៃទី២២ ខែសីហាឆ្នាំ២០២០ នៅក្នុងបរិវេណកោះពេជ្រ ជិតស្ពានឥន្ធធនូ ស្ថិតក្នុងសង្កាត់ទន្លេបាសាក់ ខណ្ឌចំការមន។
ប្រភពព័ត៌មាន បានឲ្យដឹងថា មុនកើតហេតុ គេឃើញបុរសម្នាក់បើករថយន្តមួយគ្រឿង ម៉ាក ឡិចស៊ីស RX-350 ពណ៌ស ពាក់ស្លាកលេខ ភ្នំពេញ 2AF-9666 បោះពួយយ៉ាងលឿន រេចង្កូតចុះឡើង តាមបណ្តោយផ្លូវបេតុងមាត់ទន្លេ ក្នុងទិសដៅពីជើងទៅត្បូង។ លុះពេលរថយន្ដបើកមកដល់ចំណុចកើតហេតុ ស្រាប់តែជ្រុលទៅបុកខឿនច្រាំងមាត់ទន្លេយ៉ាងពេញទំហឹង បណ្ដាលឲ្យបែកបាក់អស់ជាច្រើនម៉ែត្រ ហើយរថយន្តបង្កបន្តទៅមុខ ធ្លាក់ចូលក្នុងទឹកទន្លេ។ ប៉ុន្ដែសំណាងល្អ អ្នកបើកបរមិនរងគ្រោះថ្នាក់។
ក្រោយពេលកើតហេតុ សមត្ថកិច្ចបានស្ទូចយករថយន្ដបង្កទៅរក្សាទុក នៅការិយាល័យនគរបានចរាចរណ៍ នៃស្នងការដ្ឋាននគរបាលរាជធានីភ្នំពេញ ដើម្បីចាត់ការតាមច្បាប់៕
