រដ្ឋធានីតូរ៉ុនតូ៖ ក្រោយការផ្ទុះឡើង នៃរឿងអាស្រូវ ជុំវិញនឹងជំនួយមនុស្សនោះមក រដ្ឋមន្រ្ដីក្រសួងហិរញ្ញវត្ថុកាណាដា បានកើតការមិនសប្បាយចិត្ត ហើយចុងក្រោយ ក៏សម្រេចចិត្តលាលែងពីតំណែង ទាំងនៅក្នុងជួរគណ:រដ្ឋមន្រ្ដី និងសមាជិកសភា នៅមណ្ឌលទីក្រុងតូរ៉ុនតូ។
សារព័ត៌មាន Sputnik របស់រុស្ស៊ី បានចេញផ្សាយ នៅថ្ងៃទី១៨ ខែសីហា ឆ្នាំ២០២០ ថា រដ្ឋមន្រ្ដីក្រសួងហិរញ្ញវត្ថុ លោក Bill Morneau នឹងចុះចេញពីតំណែងរបស់លោក ទាំងនៅក្នុងជួរគណ:រដ្ឋមន្រ្ដី និងសមាជិកសភា។ លោករដ្ឋមន្រ្ដី បានសម្រេចចិត្តបែបនេះ ក្រោយការពិនិត្យ អស់រយ:ពេលជាច្រើនសប្ដាហ៍ ជុំវិញរឿងអាស្រូវ នៃជំនួយមនុស្សធម៌ នាំមានការប៉ះពាល់ដល់រដ្ឋាភិបាលរបស់លោកនាយករដ្ឋមន្រ្ដី Justin Trudeau ។
រដ្ឋមន្រ្ដីក្រសួងហិរញ្ញវត្ថុ លោក Bill Morneau បានថ្លែង កាលពីថ្ងៃចន្ទ ទី១៧ ខែសីហា ឆ្នាំ២០២០ ថា លោកនឹងលាលែងពីតំណែង ទាំងរដ្ឋមន្រ្ដីក្រសួងហិរញ្ញវត្ថុ និងសមាជិកសភា សម្រាប់មណ្ឌលទីក្រុងតូរ៉ុនតូ (Toronto) ។ ការលាលែងពីតំណែងនេះ លោកបានសម្រេចចិត្តមុន ហើយលោកនឹងមិនចូលរួមក្នុងការបោះឆ្នោតលើកក្រោយនោះឡើយ។ ប្រទេសនេះត្រូវការរដ្ឋមន្ត្រីក្រសួងហិរញ្ញវត្ថុ សម្រាប់ពិនិត្យពីការងើបឡើងវិញ នៃសេដ្ឋកិច្ច ក្នុងរយៈពេលវែង បន្ទាប់ពីការថយចុះ នៃជំងឺរាតត្បាត។
ដោយឡែក នាយករដ្ឋមន្ដ្រីកាណាដា លោក ចាស្ទីន ទ្រូដូ (Justin Trudeau ) បានសរសេរ នៅក្នុងសេចក្ដីថ្លែងការណ៍មួយថា លោកបានទទួលនូវការលាលែងពីតំណែងរបស់លោករដ្ឋមន្រ្ដីក្រសួងហិរញ្ញវត្ថុ រួចហើយ។ ជាមួយគ្នានេះ លោកក៏បានថ្លែងអំណរគុណដល់កិច្ចការខិតខំប្រឹងប្រែងរបស់លោករដ្ឋមន្រ្ដី ផងដែរ៕
