ភ្នំពេញ៖ ជនសង្ស័យម្នាក់ឃើញស្រីស្អាតនាំគ្នា អង្គុយញ៉ាំចំណីអាហារ ក៏ចូលទៅឆក់ទូរស័ព្ទ តែប៉ះចំនារីក្លាហាន ដេញចាប់ផ្អើលពលរដ្ឋ នាំគ្នាក្របួចកជាប់ វាយហើមមុខមាត់ កាលពីវេលាម៉ោង១០ និង៣០នាទីយប់ ថ្ងៃទី១០ ខែសីហា ឆ្នាំ២០២០ នៅតាមផ្លូវលេខ៨០ ចំណុចខាងក្រោយវត្តដុំដែក ស្ថិតក្នុងសង្កាត់ស្រះចក ខណ្ឌដូនពេញ។
ប្រភពព័ត៌មាន បានឲ្យដឹងថា មុនពេលកើតហេតុ គេឃើញនារីមួយក្រុមបានជួបជុំគ្នា ហូបអាហារ ហើយដាក់ទូរស័ព្ទ នៅលើតុ។ លុះមកដល់វេលាកើតហេតុ ស្រាប់តែលេចមុខជនសង័្សយដើរមកដល់ ហើយពេលឃើញឱកាសល្អ ក៏ចូលទៅឆក់ទូរស័ព្ទរត់គេចខ្លួន។ ប៉ុន្ដែភ្លាមៗនោះ នារីរងគ្រោះបាននាំគ្នាដេញតាមផ្អើលដល់ប្រជាពលរដ្ឋ ដេញចាប់បាន ហើយស្វាគមន៍ម្នាក់មួយដៃមួយជើង បណ្ដាលឲ្យជាំមុខ។
ក្រោយពេលកើតហេតុ នារីរងគ្រោះបានទៅដាក់ពាក្យបណ្ដឹង នៅប៉ុស្តិ៍នគរបាលស្រះចក។ ចំណែកជនសង្ស័យត្រូវបានសមត្ថកិច្ចឃាត់ខ្លួន និងសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌដូនពេញ ចាត់ការបន្តតាមនីតិវិធី៕
