កំពង់ត្រឡាច៖ នៅព្រឹកថ្ងៃទី២១ ខែ កក្កដា ឆ្នាំ ២០២០នេះ នៅរដ្ឋបាលឃុំច្រេស ស្រុកកំពង់ត្រឡាច ខេត្តកំពង់ឆ្នាំង បានរៀបចំបេីកសំណេីរដេញថ្លៃនៃគម្រោងមូលនិធិឃុំឆ្នាំ២០២០
ក្រោមអធិបតីភាព លោក ឆេង ចាន់ថា អភិបាលរងស្រុកកំពង់ត្រឡាច លោក ហង្ស ពិសី នាយកទីចាត់ការផែនការ និងវិនិយោគសាលាខេត្តកំពង់ឆ្នាំង និងមានការអញ្ជេីញចូលរួមពីមន្រ្តីគាំទ្រឃុំ អាជ្ញាធរឃុំ គណ:កម្មការលទ្ធកម្មតាមឃុំចំនួន ០៣ឃុំ ផងដែរ។
ឃុំដែលចូលរួមកិច្ចប្រជុំលើសំណើរដេញថ្លៃនោះ គឺមាន៖ ឃុំសែប ឃុំច្រេស និងឃុំតាជេសចូលរួម ហើយគម្រោងដែលបានដាក់ឱ្យដេញថ្លៃនោះ គឺគម្រោងជួសជុលផ្លូវលំក្រាលគ្រួសក្រហម និងគម្រោងជួសជុលផ្លូវក្រាលក្រួសធម្មជាតិ។
នៅក្នងឱកាសនោះដែរលោក ឆេង ចាន់ថា អភិបាលរងស្រុកកំពង់ត្រឡាចបានមានប្រសាសន៍ថាៈ អ្នកដេញថ្លៃត្រូវតែប្រកាន់ភ្ជាប់មកជាមួយសំណើរដេញថ្លៃរបស់ខ្លួនដែលមានសេចក្តីប្រកាសស្ដីពីក្រមសីលធម៌ ការមិនក្លែងបន្លំ និងការមិនប្រព្រឹត្តអំពើពុករលួយ ហើយត្រូវមានលិខិតធានាប្រាក់កក់ប័ណ្ណប៉ាតង់ដែលមានសុពលភាព ឬបង្កាន់ដៃបញ្ជាក់ការបង់ពន្ធប៉ាតង់បើពុំនោះសោតទេសំណើដេញថ្លៃពុំមានសុពលភាពឡើយ។
លោកបានបន្តថា និយាយជារួមអ្នកដេញថ្លៃត្រូវប្រកួតប្រជែងដោយគ្មានការឃុបខិតការក្លែងបន្លំការបង្ខិតបង្ខំ ឬការប្រព្រឹត្តអំពើពុករលួយ ក្នុងនោះដែរប្រសិនបើយេីងរកឃើញថាអ្នកដេញថ្លៃមានការពាក់ព័ន្ធ នឹងការឃុបឃិតការក្លែងបន្លំការបង្ខិតបង្ខំឬការប្រព្រឹត្តអំពេីពុករលួយអ្នកដេញថ្លៃទាំងនោះនឹងត្រូវបានដាក់ក្នុងបញ្ជីខ្មៅជារៀងរហូត និងមិនត្រូវបានអនុញ្ញាតឱ្យដាក់សំណើដេញថ្លៃកិច្ចសន្យាឃុំ/សង្កាត់ ទាំងអស់នៅទូទាំងប្រទេសកម្ពុជាហើយប្រាក់កក់ធានាការដេញថ្លៃរបស់អ្នកដេញថ្លៃទាំងនោះត្រូវបានរឹបអូសផ្ទេរបង្វែរបង់ចូលថវិការដ្ឋ ហេតុដូចនេះមុននឹងដេញថ្លៃគឺយើងត្រូវតែពិនិត្យឱ្យបានច្បាស់លាស់ទៅលើគម្រោងដែលបានដាក់ដេញជៀសវាងការដាក់ខុសនឹងការច្រឡំ។
គូសបញ្ជាក់ផងដែរថា សំណេីដេញថ្លៃត្រូវបានប្រកាសដូចខាងក្រោម៖
ទី១.ឃុំសែប អ្នកចូលរួមដេញថ្លៃមានចំនួន ៤ ក្រុមហ៊ុន តែក្រុុមហ៊ុនដែលឈ្នះក្នុងការដេញថ្លៃនោះ គឺក្រុមហ៊ុនលន់សុឃុន ដែលមានតម្លៃ ២៦.២២៤.០០០រៀល លេីតម្លៃ ព្យួ ១៣៣.៥៩០.៤១០ រៀល។
ទី២.ឃុំច្រេស មានចំនួន ៩ ក្រុមហ៊ុន តែការបើកសំណើដេញថ្លៃនោះគឺបានទៅលើក្រុមហ៊ុន ប៊ន ឌីម៉ង់ ដែលមានតម្លៃទឹកប្រាក់ចំនួន ១២.០០០.០០០រៀល លេីតម្លៃប៉ាន់ស្មាន ១៦៩.៣០៦.៦៦០រៀល។
ទី៣.ឃុំ តាជេស មានចំនួន ៩ ក្រុមហ៊ុនដែលបានដាក់ដេញពេលដែលបើកសំណើអ្នកដែលឈ្នះត្រូវបានទៅក្រុមហ៊ុន បាន ឌីម៉ង់ ដែលមានទឹកប្រាក់ ៣២.០០០.០០០ រៀលលើតម្លៃប៉ាន់ស្មានចំនួន ៣៤៦.៧០៩.៤៧០ រៀល។
លោក ហង្ស ពិសី នាយកទីចាត់ការផែនការ និងវិនិយោគខេត្តបានមានប្រសាសន៍ថាៈ បើតាមការអង្កេតនៃការដេញថ្លៃនៅថ្ងៃនេះគឺក្រុមហ៊ុនមានការចុះតម្លៃច្រើនដែលធ្វេីអោយគណៈកម្មការលទ្ធកម្មរបស់យើងត្រូវយកចិត្តទុកដាក់ឱ្យបានខ្ពស់ក្នុងការត្រួតពិនិត្យ និងតាមដានការធ្វើរបស់ក្រុមហ៊ុននិយាយរួមគឺធ្វើទៅឱ្យត្រឹមត្រូវតាមប្លង់បច្ចេកទេស និងសៀវភៅណែនាំចៀសវាងការធ្វើដោយមិនមានប្រសិទ្ធភាពលេីគម្រោង ៕
