អគ្គិភ័យបានឆាបឆេះផ្ទះប្រជាពលរដ្ឋមួយខ្នងបង្កការភ្ញាក់ផ្អើលដល់សមត្ថកិច្ចហៅរថយន្តពន្លត់អគ្គិភ័យមកចុះអន្តរាគមន៍ភ្លាមៗ និងធ្វើឱ្យលោកតាចាស់ជរាម្នាក់ស្លាប់ក្នុងបន្ទប់។ហេតុការណ៍គ្រោះអគ្គិភ័យខាងលើនេះបានកើតឡើងនៅវេលាម៉ោង១និង៤០នាទីរំលងអាធ្រាត្រឈានចូលថ្ងៃទី២២ ខែកញ្ញា ឆ្នាំ២០២១ ស្ថិតនៅផ្ទះលេខ១៥៩E២zផ្លូវលេខ១៦៩ ភូមិ៤ សង្កាត់វាលវង់ ខណ្ឌ៧មករា រាជធានីភ្នំពេញ។
បើតាមការបញ្ជាក់ឲ្យដឹងពីសមត្ថកិច្ចនគរបាលប៉ុស្តិ៍វាលវង ផ្ទះដែលរងការឆាប់ឆេះខាងលើទំហំ ៤ម៉ែត្រx ១២ម៉ែត្រ ខូចខាតសម្ភារៈទាំងស្រុង និងបណ្ដាលឱ្យស្លាប់មនុស្សម្នាក់ភេទប្រុសអាយុប្រហែល៧៣ឆ្នាំមុខរបរនៅផ្ទះពុំស្គាល់អត្តញ្ញាណនោះទេ។សមត្ថកិច្ចបានបន្តទៀតថា ករណីនេះបានប្រើរថយន្តពន្លត់អគ្គិភ័យផ្សារទំនើបអូឡាំព្យាចំនួន២គ្រឿង ប្រើប្រាស់ទឹកអស់ចំនួន៨ម៉ែត្រគូប។ រថយន្តស្នងការរាជធានីភ្នំពេញ៣គ្រឿង ១២ម៉ែត្រគូបក្នុងការពន្លត់ទប់ស្កាត់មិនឱ្យរាលដាលដល់ផ្ទះអ្នកដទៃ។
លោកនាយប៉ុស្តិ៍វាលវង់បានឲ្យដឹងថា ចំពោះអគ្គិភ័យខាងលើនេះនៅពុំទាន់ដឹងពីមូលហេតុច្បាស់លាស់ដែលបណ្ដាលឲ្យមានករណីនេះកើតឡើងនៅឡើយនោះទេ ។សមត្ថកិច្ចកំពុងធ្វើការស្រាវជ្រាវនិងស្វែងរកអត្តសញ្ញាណនៃជនរងគ្រោះ ដើម្បីស្វែងរកសាច់ញាតិនិងប្រគល់សពជូនដើម្បីយកទៅធ្វើបុណ្យតាមប្រពៃណីនិងសាសនា៕
