លោកតាវ័យ៨០ឆ្នាំម្នាក់ នឹកកូនខ្លាំងពេកខំស្កាត់ពីភ្នំពេញទៅលេងដល់ខេត្តស្រាប់តែ ឆ្លងផ្លូវចូលផ្ទះកូនត្រូវរថយន្តបុកស្លាប់គួរឲ្យអាសូរ

ព្រះសីហនុ៖ លោកតាម្នាក់ដែលមានវ័យ៨០ឆ្នាំត្រូវរថយន្តមួយគ្រឿងបុកបណ្តាលឱ្យបាត់បង់ជីវិតយ៉ាងអាណោចអាធ័ម ខណៈដែលលោកតាឆ្លងផ្លូវចូលផ្ទះរបស់កូន កាលពីវេលាម៉ោង៦និង៣០នាទីព្រឹកថ្ងៃទី២៤ ខែសីហា ឆ្នាំ២០២១ ត្រង់ចំណុចចន្លោះគីឡូម៉ែត្រ លេខ២០៨-២០៩ ស្ថិតក្នុងភូមិថ្មធំ ឃុំរាម ស្រុកព្រៃនប់ ខេត្តព្រះសីហនុ ។
បើតាមប្រជាពលរដ្ឋនៅកន្លែងកើតហេតុបានឲ្យដឹងថា លោកតារងគ្រោះមួយរូបខាងលើឈ្មោះ ហាស អ៊ិត អាយុ៨០ឆ្នាំ មានទីលំនៅឯរាជធានីភ្នំពេញ ។ ចំណែករថយន្តមួយគ្រឿង ម៉ាកសាំយ៉ុង ពណ៌ស ពាក់ស្លាកលេខ ព្រះសីហនុ 2A-4950 អ្នកបើកបរមិនស្គាល់អត្តសញ្ញាណ ។ នៅមុនពេលកើតហេតុ គេឃើញរថយន្ត១គ្រឿងខាងលើ ធ្វើដំណើរក្នុងទិសដៅពីភ្នំពេញឆ្ពោះទៅ ខេត្តព្រះសីហនុ លុះមកដល់ចំណុចកើតហេតុខាងលើក៏បានបុកលោកតាម្នាក់មកពីភ្នំពេញកំពុងដើរឆ្លងផ្លូវទៅលេងផ្ទះកូន ក្នុងភូមិរាម ឃុំរាម ស្រុកព្រៃនប់ ខេត្តព្រះសីហនុ បណ្ដាលឱ្យលោកតាបាត់បង់ជីវិតភ្លាមៗនៅនឹងកន្លែងកើតហេតុ រីឯអ្នកបើកបររថយន្តបានរត់គេចខ្លួនបាត់ ដោយបន្សល់ទុកតែរថយន្តនៅកន្លែងកើតហេតុ ។
ភ្លាមៗនោះក្រោយពេលកើតហេតុ សពរបស់លោកតារងគ្រោះត្រូវបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី រីឯរថយន្តត្រូវបានយកទៅរក្សាទុកនៅអធិការដ្ឋាននគរបាលស្រុកព្រៃនប់ដើម្បីដោះស្រាយនៅពេលក្រោយ ៕