ភ្នំពេញ៖ មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើង ដែលបណ្តាលឲ្យស្ត្រីវ័យចំណាស់ម្នាក់បានស្លាប់ភ្លាមៗ នៅនឹងកន្លែងកើតហេតុ និងស្ត្រីម្នាក់ទៀតរងរបួសធ្ងន់ កាលពីវេលាម៉ោង៧ និង៣០ នាទីយប់ថ្ងៃសុក្រទី៧ ខែឧសភា ឆ្នាំ២០២១ ត្រង់ចំណុច ខាងជើង ប្រមាណ២០០ ម៉ែត្រ ពីស្ពានទី២ តាមបណ្ដោយផ្លូវជាតិលេខ៦A ក្នុងភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ ។
ប្រភពពីកន្លែងកើតហេតុបានឲ្យដឹងថា ជនរងគ្រោះដែលស្លាប់មានឈ្មោះ ហែម ម៉ាច ភេទស្រី អាយុ៦២ ឆ្នាំ ជនជាតិខ្មែរ មុខរបរនៅផ្ទះ មានទីលំនៅភូមិក្តីចាស់ សង្កាត់បាក់ខែង ខណ្ឌជ្រោយចង្វា និងស្ត្រីម្នាក់ទៀត មិនស្គាល់អត្តសញ្ញាណនោះទេបានរងរបួសធ្ងន់ ។
ប្រភពដដែលបានបន្តថា មុនពេលកើតហេតុ ស្ត្រី២នាក់បានជិះម៉ូតូមួយគ្រឿង ម៉ាក YAMAHA ពណ៌ខៀវពាក់ស្លាកលេខភ្នំពេញ 1HO-7007 ធ្វើដំណើរតាមបណ្ដោយផ្លូវជាតិលេខ 6A ក្នុងទិសដៅពីជើងទៅត្បូងក្នុងល្បឿនលឿនលុះមកដល់ត្រង់ចំណុចកើតហេតុស្រាប់តែរេចង្កូតទៅបុកសួនច្បារពុះចែកទ្រូងផ្លូវហើយដួលបណ្តាលឲ្យផ្លោងស្ត្រី ម្នាក់ ដែលអង្គុយពីក្រោយបោកទៅនឹងបង្គោលភ្លើងស្លាប់ភ្លាមៗនៅ កន្លែងកើតហេតុ ចំណែកឯស្ត្រីម្នាក់ទៀតជាអ្នកឌុបរងរបួសធ្ងន់ត្រូវបានប្រជាពលរដ្ឋទំនាក់ទំនងហៅរថយន្តសាមុយដឹកយកទៅសង្គ្រោះបន្ទាន់ភ្លាមៗ ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ ដោយបានធ្វើកំណត់ហេតុចំពោះ ករណីខាងលើនេះ និងធ្វើលិខិតប្រគល់សព និងម៉ូតូឲ្យសាច់ញាតិយកទៅធ្វើបុណ្យតាមប្រពៃណី ៕
