ភ្នំពេញ ៖ បុរសម្នាក់បានដើរចូលទៅក្នុងភូមិរបស់គេដែលកំពុងតែចងខ្សែ និងធ្វើចត្តាឡីស័ក បណ្តាលឱ្យអ្នកភូមិផ្អើលនាំគ្នារត់ដេញតាមវ៉ៃបុរសរូបនោះ ចំណែកសមត្ថកិច្ចវិញស្មានតែជាករណីចោរលួច ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៩និង១៥នាទីយប់ ថ្ងៃទី២៥ ខែមេសា ឆ្នាំ២០២១ តាមបណ្តោយផ្លូវព្រះមុនីវង្ស នៅចំណុចចុងស្ពានជ្រោយចង្វារត្រើយខាងលិច ស្ថិតក្នុងសង្កាត់ស្រះចក ខណ្ឌដូនពេញ។
សមត្ថកិច្ចបានអោយដឹងថា មុនពេលកើតហេតុខាងលើនេះ គេបានឃើញបុរសម្នាក់មិនស្គាល់អត្តសញ្ញាណនោះទេ ពាក់អាវពណ៌លឿង ហើយមិនដឹងថា តើរូបគាត់មកពីណានោះទេ? ក៏ស្រាប់តែបុរសរូបនេះបានដើរចូលភូមិរបស់គេ ដែលកំពុងតែធ្វើចត្តាឡីស័ករយៈពេល១៤ថ្ងៃ។
សមត្ថកិច្ចបន្តថា ភ្លាមៗនោះដែរ ក៏ស្រាប់តែអ្នកភូមិមានទាំងស្រី មានទាំងប្រុស ផ្អើលនាំគ្នារត់តាមដេញវ៉ៃបុរសរូបនោះបង្កអោយមានការភ្ញាក់ផ្អើលកើតឡើងតែម្តង។
ក្រោយពេលកើតហេតុខាងលើនេះ សមត្ថកិច្ចក៏បានធ្វើការណែនាំ រួចក៏បន្តអោយពួកគេចាក់ចេញពីកន្លែងកើតហេតុចុះ ដើម្បីកុំអោយមានការភ្ញាក់ផ្អើល៕
