ខេត្តប៉ៃលិន ៖ បុរសជាជាងផ្សារដែកម្នាក់ បានទទួលរងរបួសធ្ងន់ ក្រោយឡើងធ្វើដំបូលសំយ៉ាបផ្ទះ ដោយលើកដែកឡើងទៅលើ ប៉ះជាមួយចរន្តខ្សែភ្លើងធំ នៅជាប់នឹងបង្គោលតាមដងផ្លូវ បណ្ដាលឲ្យឆក់ កាលពីរសៀល ថ្ងៃពុធ ១០រោច ខែចេត្រ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៧ ខែមេសា ឆ្នាំ២០២១ ស្ថិតនៅភូមិអូពឺត សង្កាត់ទួលល្វា ក្រុងប៉ៃលិន ខេត្តប៉ៃលិន។
ជនរងគ្រោះ ឈ្មោះ ញិត សារ៉ាន់ អាយុ៣៦ឆ្នាំ មុខរបរ ជាងផ្សារដំបូលផ្ទះ ទីលំនៅបច្ចុប្បន្ន នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន។
ម្ចាស់ផ្ទះឈ្មោះ ប៊ុត ធា ភេទប្រុស អាយុ៣៦ឆ្នាំ បច្ចុប្បន្ន នៅភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន។
ជនរងគ្រោះ បានមកធ្វើដំបូលសំយ៉ាបផ្ទះ ឲ្យម្ចាស់ផ្ទះខាងលើ និងបានឡើងផ្សារដំបូលសំយ៉ាបផ្ទះ ដោយបានលើកដែកឡើងទៅលើ ប៉ះជាមួយចរន្តខ្សែភ្លើងធំ នៅជាប់នឹងបង្គោលតាមដងផ្លូវ បណ្ដាលឲ្យឆក់ធ្លាក់មកដី និងរងរបួសធ្ងន់។
បច្ចុប្បន្នជនរងគ្រោះ ត្រូវបានបញ្ជូន ទៅសង្រ្គោះនៅមន្ទីរពេទ្យខេត្តបាត់ដំបង៕
